मेढा, जि. सातारा : जावळी तालुक्‍यात रानडुकरांमुळे ज्वारी, भुईमूग, हरभरा, फराशी आदी पिकांचे नुकसान झाले आहे. काढणीस आलेली पिके वन्य प्राणी रात्री फस्त करत असल्यामुळे शेतकरी हवालदिल झाले आहेत. वन विभागाने लक्ष देण्याची गरज निर्माण झाली आहे.  दिवसा पक्षी, तर रात्री वन्यप्राणी शेतातील उभ्या पिकांचे मोठे नुकसान करत आहेत. त्यामुळे जावळीतील शेतकरी त्रस्त झाले असून, दिवसा शेताच्या राखणीमुळे काम करता येईना, रात्रभर शेतात जावून ऐन थंडीत पहारा द्यावा लागत असल्यामुळे झोप मिळेना, अशी दैना शेतकऱ्यांची झाली आहे. वन्य प्राण्यांचा बंदोबस्त वन विभगाने करावा, अशी मागणी जोर धरत आहे. वन विभागाकडून नुकसानीचे पंचनामे वेळेत होत नाहीत. पंचनामे झाले तर मदत तुटपुंजी मिळते. मोठ्या शेतातून रानडुक्कर फिरलेल्या पिकांची मदतही मिळत नाही. नुकसानीची मदत मिळते, असे म्हणणारे अधिकारी नुकसानीची पाहणी करताना टेप टाकून मापे घेतात.

त्यामुळे रानडुक्कर फिरलेल्या पिकांची मदतही मिळत नाही. त्यामुळे शेतकऱ्यांचे मोठे नुकसान होत आहे.  रानडुकरांमुळे ज्वारी, भुईमूग, हरभरा, फराशी आदी पिकांचे नुकसान होत आहे. काढणीस आलेली शिवारे रानडुकरे फस्त करीत असल्यामुळे शेतकऱ्यांचे मोठे नुकसान होत आहे. वन विभागाने दक्षता घेण्याची शेतकऱ्यांची मागणी आहे.