अकोला  ः नापिकी, कर्जबाजारीपणामुळे जिल्ह्यात शेतकरी आत्महत्या झाल्या आहेत. घरातील कर्तापुरुष निघून गेल्यानंतर कुटुंबातील सदस्यांना मोठ्या अडचणींना सामोरे जावे लागते. शेतकरी आत्महत्याग्रस्त किंवा नैसर्गिक आपत्तीत मृत झालेल्या शेतकऱ्याच्या कुटुंबाला जिल्हा परिषदेमार्फत आर्थिक मदत देण्याचा निर्णय घेण्यात आला. या अंतर्गत आत्महत्याग्रस्त शेतकरी कुटुंबातील मुलीच्या लग्नासाठी अकोला जिल्हा परिषद २१ हजार रुपयांची मदत करणार आहे.

अकोला जिल्हा परिषदेत काही दिवसांपूर्वी नवीन पदाधिकारी सत्तारूढ झाले. त्यानंतर कृषी समितीची पहिलीच सभा सोमवारी (ता. २४) सभापती पंजाबराव वढाळ यांच्या अध्यक्षतेखाली झाली. या वेळी समितीचे सचिव तथा जिल्हा परिषदेचे कृषी विकास अधिकारी मुरलीधर इंगळे तसेच अन्य सदस्य उपस्थित होते. या बैठकीत जिल्हा परिषद कृषी समितीचे सुधारीत व मूळ बजेट वाढवून आता तीन कोटी करण्यात आले आहे. या निधीतून जिल्ह्यातील सर्वसाधारण शेतकऱ्यांना ९० टक्के अनुदानावर विविध घटकांचा लाभ दिला जाणार आहे.

यात प्रामुख्याने प्लॅस्टिक ताडपत्री पुरवठा, रिचार्जेबल टॉर्च, बॅटरी ऑपरेटेड पॉवर स्प्रे, एचडीपी पाइप, पीव्हीसी पाइप, सोयाबीन स्पायरल सेपरेटर, सबमर्सिबल पंपाचे वाटप केले जाणार आहे. या सोबतच आत्महत्याग्रस्त किंवा नैसर्गिक आपत्तीमध्ये मृत पावलेल्या शेतकरी व शेतमजुराच्या कुटुंबातील मुलीचे लग्न होणार असेल तर त्याकरिता जिल्हा परिषदेमार्फत लग्नासाठी २१ हजार रुपयांचे अर्थसाहाय्य केले जाणार आहे. या प्रस्तावाला बैठकीत सर्व सदस्यांनी मंजुरी दिली.