सिंधुदुर्ग ः जिल्ह्यातील भातपिकावर प्रामुख्याने करपा, कडा करपा रोगाचा प्रादुर्भाव दिसून येत आहे. पीक फुलोऱ्यावर असताना कीड -रोगांचा प्रादुर्भाव वाढल्याने शेतकऱ्यांची चिंता वाढली आहे.

जिल्ह्यात या खरीप हंगामात सुमारे ५५ हजार हेक्टरवर भात लागवड झालेली आहे. यावर्षी रोपांची वाढ जोमदार आहे. जिल्ह्यातील सर्वच भागांत भात शेतीची स्थिती समाधानकारक आहे.

गेल्या आठवडाभरापासून जिल्ह्यातील बहुतांश भागात ऊन पावसाचा खेळ सुरू आहे. कणकवली, वैभववाडी, देवगड तालुक्याच्या काही भागांत प्रतिकूल हवामानामुळे भात पिकावर करपा रोगाचा प्रादुर्भाव दिसुन येत आहे. सध्या मे महिन्याच्या अखेरच्या आठवडयात पेरणी आणि जूनच्या दुसऱ्या आठवड्यात भात रोपांची लागवड झालेले पीक आता फुलोऱ्याला आले आहेत. फुलोऱ्यावर पिक असताना रोगांचा प्रादुर्भाव झाल्यामुळे शेतकऱ्यांची चिंता वाढली आहे.

जिल्ह्यातील ८० टक्के भात पोटरीमध्ये आहे. या काळात पावसाची गरज आहे. परंतु, गेल्या चार ते पाच दिवसांत पाऊस न पडल्यामुळे भातशेती देखील संकटात आहे.

प्रतिक्रिया भात पिकावर करपा, शेंडे करपा रोग नियंत्रणासाठी शिफारशीत बुरशीनाशकाची फवारणी करावी. सध्या काही अपवाद वगळता बहुतांशी भात पीक पोटरीत असून पाण्याची गरज आहे. ज्या शेतकऱ्यांकडे पाण्याची सुविधा आहे त्यांनी भातशेतीला पाणी द्यावे. - विवेकानंद नाईक, कृषी पर्यवेक्षक, कृषी विभाग, सिंधुदुर्ग.