रत्नागिरी  ः जिल्ह्यात यंदा खरीप हंगामात पीककर्ज घेणाऱ्या शेतकऱ्यांचे प्रमाण अत्यंत कमी आहे. रत्नागिरी जिल्हा मध्यवर्ती बँकेकडून शुक्रवारपर्यंत (ता.५) ५ कोटी ३७ लाख रुपयांचे पीककर्ज वाटप करण्यात आले आहे.

जिल्ह्यात सव्वालाख शेतकरी सभासद असून ८५ हजार हेक्टर क्षेत्र आहे. यामध्ये भात लागवडीचे क्षेत्र सुमारे ७० हजार हेक्टर आहे. सध्या गावोगावी मोठ्या प्रमाणात चाकरमानी मुंबईहून दाखल झाले आहेत. त्यामुळे ‘कोरोना’ची धास्ती वाढली आहे. रुग्ण संख्या अधिक असून एसटीसह खासगी वाहतूक अजूनही बंद आहेत. त्याचा परिणाम पीककर्ज वाटपावर होत आहे.

काहींनी भात पेरणीला सुरुवातही केली आहे. मात्र यंदा खरीप पीक कर्ज घेण्यावर ‘कोरोना’चे सावट आहे. रत्नागिरी जिल्ह्यात शेतकरी कमी प्रमाणात पीक कर्ज उचलतात. त्यानुसार बँकांनी कर्ज वाटपाची तयारी केली आहे. रत्नागिरी जिल्हा मध्यवर्ती बँकेसह अग्रणी बँक शाखानिहाय कर्ज देण्यासाठी प्रयत्न करत आहेत. सर्वाधिक शेती कर्जाची मागणी जिल्हा बँकेकडून होते. जिल्ह्यातील बॅंकांना यंदा ५५ कोटी रुपयांचे पीककर्ज वितरणाचे उद्दिष्ट देण्यात आले आहे. आत्तापर्यंत या बँकेकडून ५ कोटी ३७ लाख ७० हजार रुपयांचे पीककर्ज वितरित करण्यात आले आहे. रत्नागिरी,  गुहागर आणि मंडणगड तालुक्यातील शेतकऱ्यांनी अद्यापही पीक कर्ज घेतलेले नाही.