कोल्हापूर : सुरक्षेच्या कारणास्तव तपोवन मैदानावर होणारे भाजीपाल्याचे सौदे सोमवारपासून (ता.३०) पुन्हा बाजारसमितीच्या आवारातच होणार आहेत. प्रशासनाने गर्दी टाळण्यासाठी शनिवारपासून (ता.२८) तपोवन मैदानावर भाजीपाल्याचे सौदे काढण्याचे ठरवले होते.  

बाजारसमितीच्या सूत्रांनी दिलेल्या माहितीनुसार येथे फक्त घाऊक सौदे होणार होते. किरकोळ विक्री शहरातील विविध ठिकाणी होणार होती. पण शनिवारी स्थानिक नागरिकांना याची फारशी माहिती नसल्याने किरकोळ खरेदीसाठी नागरिकांनी गर्दी केली. यामुळे सौदयात अडथळे आलेच पण जादा गर्दी झाल्यामुळे सौदे प्रशस्त ठिकाणी हलवण्याचा निर्णयच अंगलट आला. रविवारीही तशीच स्थिती राहिली जर पुन्हा मैदानात सौदे सुरू झाल्यास किरकोळ खरेदीसाठी गर्दी होण्याची शक्यता असल्याने सौदे सोमवारपासून बाजारसमितीच्या आवारातच होतील, अशी माहिती बाजारसमितीचे सचिव मोहन सालपे यांनी दिली. यासाठी बाजारसमितीतच वेगवेगळ्या ठिकाणी सोय आम्ही केल्याचे श्री. सालपे यांनी सांगितले.