Paddy Farming : यंदा उत्तर भारतात पावसाने दमदार हजेरी लावली. डोंगराळ भागात तसेच मैदानी भागात मुसळधार पावसामुळे पाणी पूरस्थिती निर्माण झाली आहे.  पूराच्या पाण्यात  खरीपाचे पिके पाण्याखाली गेली आहेत. त्यामुळे शेतकऱ्यांच्या चेहऱ्यावर आनंदाएेवजी काळजीच्या रेषा दिसत आहेत.
 
 हरियाणा राज्यातील करनाल जिल्ह्यामध्ये झालेल्या मुसळधार पावसात सुमारे ५० हजार एकर क्षेत्रावरील खरीप हंगामातील भातासह इतर पिके वाया गेली आहेत. त्यामुळे शेतकऱ्यांना मोठा आर्थिक फटका बसला आहे.

मागील आठवड्यापासून हरियाणामध्ये वादळी वाऱ्यासह झालेल्या पावसामुळे उंद्री आणि कुंजपुरामधील अनेक गावे पाण्याखाली गेले. तर यमुना नदीच्या पाणी पातळीत कमाली वाढ झाली. पूराचे पाणी नदीकाठच्या गावांमध्ये शिरल्याने अनेक जिल्हे प्रभावित झाले आहेत. पूराच्या पाण्यात शेतातील भात बुडाल्याने पीके वाया गेली आहे. त्यामुळे भाताच्या पुनर्लागवडसाठी भात रोपांची मागणी वाढली आहे. अतिवृष्टीमुळे शेतकऱ्यांवर आलेल्या दुबार पेरणीच्या संकटातून बाहेर पडण्यासाठी शासनाने तातडीने मदत जाहीर करावी, अशी मागणी शेतकऱ्यांकडून केली जात आहे.

पावसामुळे झालेल्या नुकसानीचा पंचनामा करण्यासाठी प्रशासन पाणी ओसरण्याची वाट पाहत आहे. प्रशासनाच्यावतीने सांगण्यात आले आहे की, सध्याच्या पूरसदृश्य भागात बचाव कार्य सुरू असून बाधितांना सुरक्षित स्थळी हलवण्याचे प्रयत्न सुरू आहेत. शिबीर स्थळावर बाधितांना अन्नाचे पाकिट आणि पिण्याचे पाणी पुरवण्यात येत आहे. तसेच वैद्यकीय सेवा सुविधा उपलब्ध करून दिल्या जात आहेत.  

हरियाणाच्या काही भागात पावसाचा इशारा 

हवामान खात्याने दिलेल्या माहितीनुसार, अरुणाचल प्रदेश, आसाम, मेघालय, नागालँड, मणिपूर, उप-हिमालयीन पश्चिम बंगाल, सिक्कीम, ओडिशा, उत्तर प्रदेश, हिमाचल प्रदेश, मध्य प्रदेश, छत्तीसगड, कोकण-गोवा, मध्य महाराष्ट्र, हरियाणाच्या काही भागांसह आज तामिळनाडू, पुद्दुचेरी, कराईकल, किनारपट्टी आणि दक्षिण अंतर्गत कर्नाटक आणि केरळच्या काही भागात मुसळधार पावसाची शक्यता आहे. तर हिमाचल प्रदेश, उत्तराखंड आणि ओडिशामध्ये पुढील पाच दिवस मुसळधार पाऊस पडण्याची शक्यता आहे.