चोपडा, जि. जळगाव : जळगाव जिल्हा बँकेत महाविकास आघाडीत चोपडा तालुका सोसायटी मतदारसंघाची जागा राष्ट्रवादी काँग्रेसकडे घेण्याचा प्रयत्न केला जाईल. राष्ट्रवादीचे उमेदवार घनश्याम अग्रवाल राहतील. उमेदवारी अर्ज दाखल केलेल्या व्यक्तींना समजविण्याचा प्रयत्न केला जाईल, अशी माहिती माजी विधानसभाध्यक्ष अरुण गुजराथी यांनी दिली.

गुजराथीवाडीत जिल्हा बँकेसंदर्भात तालुक्यातील सोसायटी मतदारसंघातून ठराव झालेल्या व्यक्ती, चेअरमन यांच्या दिवाळी स्नेह मेळाळ्यात ते बोलत होते. व्यासपीठावर माजी आमदार कैलास पाटील, दिलीप सोनवणे, ॲड. घनश्याम पाटील, गोरख पाटील, नगराध्यक्षा मनीषा चौधरी, चोसाका अध्यक्ष अतुल ठाकरे, संचालक आनंदराव रायसिंग, इंदिराताई पाटील, सत्रासेन आदिवासी सेवा मंडळाचे अध्यक्ष रवींद्र भादले, आदी उपस्थित होते.

श्री. गुजराथी म्हणाले, ‘‘तालुक्यातील सोसायटी मतदारसंघात ६४ ठराव आहेत. त्यांना प्रत्येकास भ्रमणध्वनीवर संपर्क केला असून, त्यापैकी ५० ते ५२ ठरावधारकांनी मला प्रत्यक्ष होकार दिला आहे. मागील पंचवार्षिकमध्ये सोसायटी आम्ही तुम्हाला संधी दिली, आता या वेळी आम्हाला संधी द्यावी,’’ असे आहवान त्यांनी इतर पक्षांच्या नेत्यांना केले.