रत्नागिरी ः सागरी मत्स्योत्पादनात महाराष्ट्र देशात चौथ्या क्रमांक आहे. शासनाने जाहीर केलेल्या २०१८-१९ च्या आकडेवारीनुसार कोकणातील पाच जिल्ह्यांमध्ये सर्वाधिक उत्पादन ठाणे जिल्ह्यात मिळाले असून सर्वांत कमी सिंधुदुर्गामध्ये आहे. रत्नागिरी जिल्ह्यात गतवर्षीच्या तुलनेत सात हजार मेट्रिक टनाने उत्पादन घटले आहे. जिल्ह्यात ७३ हजार ७३८ मेट्रिक टन उत्पादन मिळाले असून गतवेळी ते ८० हजार ३४० मेट्रिक टन होते. मत्स्य विभागाकडून मिळालेल्या माहितीनुसार, बुरोंडी बंदराच्या अखत्यारीत ७४० नौका असून तेथून २०१८-१९ मध्ये ५ हजार ८९० मेट्रिक टन, दाभोळ बंदराच्या हद्दीतील ८२७ नौका असून तेथून १५ हजार ६६६ मेट्रिक टन, तर सर्वांत मोठे बंदर म्हणून ओळखल्या जाणाऱ्या मिरकरवाडा बंदरात ९२७ नौका असून ४४ हजार ५१६ मेट्रिक टन उत्पादन मिळाले. जिल्ह्यातील उर्वरित सुमारे एकवीस मच्छी उतरवणाऱ्या केंद्रावरील १ हजार ७४ नौका असून त्यातून ७ हजार ६६६ मेट्रिक टन उत्पादन मिळाले. जिल्ह्यात २००५-०६ मध्ये १ लाख ५ हजार ६९ टन उत्पादन होते. २००७-०८ ला त्यात घट झाली आणि ते ८५ हजार ९९ मेट्रिक टनावर आले. पुढे सहा वर्षे मत्स्योत्पादनातील घट कायम राहिली.  उत्पादन ७० ते ९० मेट्रिक टनापर्यंत होते. २०१३-१४ आणि २०१४-१५ या दोन वर्षांत हे उत्पादन पुन्हा १ लाख १५ हजार ४२ मेट्रिक टनावर पोचले होते. त्यानंतर फेब्रुवारी २०१५ ला पुन्हा उतरती कळा लागली. पर्ससिन मासेमारीवरील निर्बंधाचा फटका मत्स्योत्पादनाला बसल्याचा अंदाज वर्तविण्यात येत आहे. त्याचबरोबर अनिश्‍चित वातावरण आणि परराज्यातील बोटींचे अतिक्रमण ही प्रमुख कारणे मस्त्योत्पादन घटण्याला पूरक आहेत. गतवर्षी दक्षिण राज्याकडील ट्रीगरफिश (काळामासा) मोठ्या प्रमाणात आढळून आला होता. या माशांमुळे अन्य मासे रत्नागिरीच्या किनारी सापडत नव्हते. त्याचा परिणाम मत्स्योत्पादनावर होईल अशी अटकळ गतवर्षी बांधण्यात आली होती. त्यामुळे ही परिस्थिती निर्माण झाली आहे. अन्य जिल्ह्यांतील सागरी मत्स्योत्पादन