लातूर : लातूर जिल्ह्यात सोयाबीनचे वाढते क्षेत्र, वाढते उत्पादन, बाजारपेठ व उद्योग लक्षात घेता येथील एमआयडीसीत क्लस्टर डेव्हल्पमेंट अंतर्गत सोया पार्क उभारण्यासाठी प्रयत्न केले जातील; तसेच उस्मानाबाद जिल्ह्यात फटाका क्लस्टर निर्माण करून रोजगाराच्या संधी उपलब्ध करून देऊ, अशी ग्वाही उद्योगमंत्री सुभाष देसाई यांनी येथे दिली.

शिवसेनेच्या मेळाव्यानिमित्ताने गुरुवारी (ता.२८) श्री. देसाई येथे आले होते. त्यांनी येथे एमआयडीसीतील उद्योजकांची बैठक घेऊन त्यांच्या अडचणी जाणून घेतल्या. तसेच एमआयडीसीचा विकास करण्यासाठी प्रयत्न करणार असल्याचे त्यांनी सांगितले.

लातूर जिल्ह्यात सोयाबीनचे उत्पादन व क्षेत्र वाढत आहे. येथे सोयाबीनची मोठी बाजारपेठ आहे. सोयाबीनपासून तेल निर्मिती करणाऱ्या कंपन्याही येथे आहेत. येथे सोयाबीनपासून उपपदार्थ तयार करण्याला मोठा वाव आहे. त्यात सोया बिस्कीट, सोया मिल्क, सोया चिज, सोया पनीर, सोया सॉस, जनावराचे खाद्य असे अनेक उद्योग येथे उभारले जाऊ शकतात. हे लक्षात घेऊन टेक्स्टॉईल पार्कच्या धरतीवर येथे सोया पार्क उभारण्यासाठी प्रयत्न केले जातील, याकरिता उद्योजकांनी पुढे यावे. या पार्ककरिता जमीन उपलब्ध करून दिली जाईल. तसेच ८० टक्के अनुदानावर त्याकरिता लागणारे साहित्यही उपलब्ध करून दिले जाईल, असे त्यांनी या वेळी सांगितले.

येथील अतिरिक्त एमआयडीसी टप्पा दोन, लातूर विमानतळ, घरणी येथील भूसंपादनाचे प्रश्न मार्गी लावले जातील. तसेच अहमदपूर व उदगीर येथे नवीन एमआयडीसीसाठी जागा घेऊन उद्योजकांना प्रोत्साहन दिले जाईल. येथील एमआयडीसीअंतर्गत रस्त्याची दुरुस्तीही लवकर करण्यात येईल, अशी माहिती श्री. देसाई यांनी या वेळी दिली.

या वेळी एमआयडीसी प्रादेशिक अधिकारी महेश मेघमाळे यांनी विभागाची माहिती दिली. यात त्यांनी येथे सोया पार्क होऊ शकते ही संकल्पना मांडली. श्री. देसाई यांनी ही संकल्पना उचलून धरत त्यादृष्टीने प्रयत्न करण्याचे आश्वासन उद्योजकांना दिले. या वेळी खासदार चंद्रकांत खैरे उपस्थित होते.