नगर : पावसाळा सुरू होऊन १५ दिवस होत आले तरी अजून पाऊस झालेला नाही. त्यामुळे आता शेतकरी आकाशाकडे डोळे लावून बसले आहेत. पश्‍चिमेकडून सुटलेल्या जोरदार वाऱ्याने जिवाला घोर लावला असून पावसाचा मोठा खंड (बखाडी) पडण्याची भीती व्यक्त केली जात आहे. फळबाग, ऊस व चारापिके वाचवण्यासाठी धडपड सुरू असल्याचे शेतकऱ्यांनी सांगितले.

जूनमध्ये सुरवातीलाच चांगला पाऊस झाल्यास शेतकरी खरिपाची तयारी सुरू करतात. मात्र, जूनमधील १६ दिवस उलटूनही पाऊस झालेला नाही. मृगाचा पाऊस झाल्यानंतर सुरवातीलाच कापसाची लागवड झाली, तर पुढील पाण्याचा स्रोत गृहीत धरून पुढील पिकांचेही नियोजन केले जाते. यंदा मात्र पावसाळा सुरू होऊन १५ दिवसांचा कालावधी उलटला असला, तरी अजूनही पाऊस नाही.

उन्हाळ्यापेक्षा पावसाळ्याच्या तोंडावर बहुतांश भागात टंचाई जाणवते. मात्र मृगाच्या पावसामुळे दिलासा मिळत असतो. यंदा मात्र परिस्थिती वेगळी होत आहे. कापूस लागवड, पेरणी तर रखडली आहेच; पण सध्या असलेल्या फळबागा, चारापिके, ऊस व भाजीपाला पिके वाचवण्यासाठी शेतकऱ्यांची धडपड सुरू आहे.

सध्या पश्‍चिमेकडून जोरदार वारे वाहत आहेत. दिवसभर ढगांची गर्दी होत असली, तरी रात्री चांदणं पडत आहे. बहुतांश वेळा आषाढ, श्रावणात अशी स्थिती असते. यंदा पावसाळ्याच्या सुरवातीलाच अशी परिस्थिती निर्माण झाल्याने शेतकऱ्यांना पावसाच्या मोठा खंड (बखाडी) पडण्याची भीती व्यक्त केली जात आहे.