सोलापूर ः जिल्हा परिषदेच्या वतीने यंदाच्या अर्थसंकल्पीय वर्षात महात्मा गांधी राष्ट्रीय ग्रामीण रोजगार हमी योजनेच्या माध्यमातून ७० कोटी रुपयांची कामे केली जाणार आहेत. या कामांकडे दुर्लक्ष करणाऱ्या अधिकारी व कर्मचाऱ्यांवर कारवाई केली जाणार आहे. 

जिल्हा परिषदेचे मुख्य कार्यकारी अधिकारी डॉ. राजेंद्र भारुड यांनी नुकताच या कामांचा आढावा घेतला. त्यात त्यांनी प्रत्येक तालुक्‍यात किमान पाच नाला खोलीकरणाची कामे सुरू करण्याच्या सूचना दिल्या. सर्व प्रक्रिया पूर्ण करून पुढील १५ दिवसांत ती कामे सुरू करण्यास त्यांनी सांगितले. जिल्ह्यात ९१६ अहिल्यादेवी होळकर सिंचन विहिरींना मंजुरी दिली आहे. कोणत्याही स्थितीत या आठवड्यात ती कामे सुरू करण्यास त्यांनी सांगितले. त्याचबरोबर जिल्ह्यातील प्रत्येक गावात किमान एकतरी काम सुरू असणे आवश्‍यक आहे.

पाणी फाउंडेशनच्या कामांसाठी निवड झालेल्या गावांत नाला खोलीकरणाची कामे हाती घेण्याच्या सूचना डॉ. भारुड यांनी अधिकाऱ्यांना दिल्या आहेत. या बैठकीला तालुकास्तरावरील बांधकाम, लघु पाटबंधारे, ग्रामीण पाणीपुरवठा या विभागाचे उपअभियंता, विस्तार अधिकारी उपस्थित होते.