सोलापूर : जिल्ह्यातील उत्तर सोलापूर, दक्षिण सोलापूर व अक्कलकोट तालुका वगळता उर्वरित आठ तालुक्‍यांतील उसाला ‘हुमणी'' या रोगाने ग्रासले आहे. यापासून शेतकऱ्यांना दिलासा देता यावा, यासाठी जिल्हा परिषदेच्या सेस फंडातून १० लाख रुपयांचे अनुदान देण्याचा निर्णय कृषी समितीच्या बैठकीत घेण्यात आल्याची माहिती सभापती मल्लिकार्जुन पाटील यांनी दिली.

जिल्ह्यातील पंढरपूर, माळशिरस, माढा, मोहोळ, बार्शी, मंगळवेढा, सांगोला, करमाळा या तालुक्‍यांतील जवळपास २९ हजार हेक्‍टर क्षेत्रावरील ऊस पीक ‘हुमणी'ने बाधित झाल्याचा प्राथमिक अंदाज आहे. या रोगाच्या औषधासाठी शेतकऱ्यांना ९० टक्के अनुदान देण्याचा निर्णय कृषी समितीच्या बैठकीत घेण्यात आला. सेस फंडातील १० लाख रुपये या आठ तालुक्‍यांतील शेतकऱ्यांना देण्यात येतील. शेतकऱ्यांनी त्यांच्याकडील १० टक्के रक्कम टाकून या रोगासाठी औषधांची खरेदी करायची आहे.

जिल्हा परिषदेच्या कृषी समितीने घेतलेल्या या निर्णयामुळे ऊसउत्पादक शेतकऱ्यांना काहीसा दिलासा मिळाला आहे. दुष्काळी परिस्थितीतून सुटका होण्यासाठी या मदतीचा थोडासा हातभार लागणार आहे. बैठकीसाठी गणेश पाटील, रेखा राऊत, संगीता मोटे, दादासाहेब बाबर, जिल्हा कृषी विकास अधिकारी एस. पी. बेंदगुडे उपस्थित होते.