येवला : पर्जन्याच्या आकड्यांवर नजर टाकल्यास तालुक्याचा क्रमांक आकडेवारीत जिल्ह्यात तिसरा लागतो. प्रत्यक्षात अर्धा तालुका अजूनही तहानलेला आहे. पाण्याअभावी पिकांचे नुकसान झाले आहे, तर ५० वर वाड्या-वस्त्यांना टँकरने पाणीपुरवठा सुरू असून बंधारे, विहिरी कोरड्याठाक आहेत.

ब्रिटिशकालीन दुष्काळी असलेल्या या तालुक्याचे पर्जन्यमान मुळातच जिल्ह्यात सर्वाधिक कमी आहे. त्यातच यावर्षी अजूनही मुसळधार पाऊस पडलेला नसल्याने सर्वत्र विहिरी, नदी, नाले कोरडेठाक आहेत. विशेषता डोंगरी पूर्व भागात पाऊस नावालाच असल्याने पिके करपली आहेत. पिण्यासाठी देखील पुरेसे पाणी नसल्याने अद्यापही नागरिकांची भटकंती होत आहे.

याउलट चित्र पालखेड डाव्या कालव्याच्या लाभक्षेत्रात आहे. पाऊस नसला तरी कालव्यातून १५ दिवसांपासून पाणी सुरू असून वितरिकाना पाणी सोडले जात असल्याने शेतीला मोठा आधार मिळाला आहे. तालुक्यातील पिकांची स्थिती मात्र बेताची झाली असल्याने उत्पन्नात ३० ते ५० टक्के हानी होणार आहे. पाण्याअभावी अर्धा पावसाळा झाला तरी आजही ३१ गावे व १९ वाड्याना टॅंकरने पाणीपुरवठा सुरूच आहे.

दुसरीकडे तालुक्यात पेठ, सुरगाणा, इगतपुरीच्या तुलनेत तिसऱ्या क्रमाकांचा पाऊस येथे पडल्याचे टक्केवारी सांगत आहे. अत्यल्प प्रमाण व संततधारेने फुगलेले आकडे, यामुळे पावसाचे प्रमाण तब्बल ९२.४१ टक्के दाखवत आहे. मात्र, प्रत्यक्षात परिस्थिती कठीण आहे.