सांगली ः टेंभू उपसा सिंचन योजनेच्या नेवरी वितरिका आणि त्यावरील नऊ उपवितरिकांची कामांची सर्व्हेक्षण केले आहे. ही कामे शुक्रवार (ता. २२) फेब्रुवारीपासून सुरू केली जातील, अशी माहिती पाटबंधारे विभागाच्या सूत्रांनी दिली. 

टेंभू उपसा सिंचन योजनेमुळे दुष्काळी पट्ट्यातील अनेक गावांना पाणी मिळाले आहे. मात्र, अद्यापही अनेक गावे या योजनेपासून वंचित आहेत. या गावांना पाणी देण्यासाठी पाटबंधारे विभागाने आराखडे तयार केले आहेत. टेंभूच्या नेवरी वितरिकेच्या आराखड्यास गेल्या पाच वर्षांपूर्वीच मंजुरी मिळाली असून, काम करण्याचा ठेकाही दिला होता. ज्या कंपनीने या कामा ठेका घेतला होता. त्याने कामाला सुरवात केली नाही. या वितरिकेची कामे कधी सुरू होणार असा प्रश्न उपस्थित झाला होता. आता की कामे मार्गी लागली आहे. ही वितरिका कडेगाव आणि खानापूर या दोन तालुक्यांच्या सीमेवरून जात आहे. या कामाच्या आराखड्याला पुन्हा मंजुरी मिळाली आहे. 

खानापूर-तासगाव कालव्याच्या २४ किलोमीटरला गार्डी गावाजवळ टेंभूची ही नेवरी वितरिका सुरू होते आहे. सुमारे १४ किलोमीटर लांबीची ही वितरिका आहे. या वितरिकेतून थेट ९६५ हेक्टरसाठी तर उपवितरिकांच्या माध्यमातून ३ हजार हेक्टरपेक्षा अधिक क्षेत्र ओलिताखाली येणार आहे. 

वितरिकांच्या परिघात दोन्ही  बाजूस ३८ किलोमीटरपर्यंत टेंभूचे पाणी मिळणार आहे. खानापूर तालुक्याच्या घाटमाथ्यावर पाणी येणार असल्याने द्राक्ष पिकास याचा फायदा होईल. यामुळे या भागात कायम असलेली पाणीटंचाई दूर होण्यास मदत होणार आहे.