नाशिक : नाशिक शिवारातील हनुमानवाडी व मखमलाबाद येथील स्मार्टसिटी अंतर्गत प्रस्तावित नगरपरियोजनेला स्थानिक शेतकऱ्यांचा विरोध असल्याने त्यासंदर्भात लवकरच तोडगा काढण्याचे आश्‍वासन राष्ट्रवादी काँग्रेसचे अध्यक्ष शरद पवार यांनी शेतकऱ्यांच्या शिष्टमंडळाला दिले. शेतकऱ्यांवर अन्याय होऊ दिला जाणार नाही. वादावर तोडगा काढण्यासाठी राज्याचे नगरविकासमंत्री, स्मार्ट कंपनीचे अधिकारी व शेतकऱ्यांची संयुक्त बैठक घेऊन तोडगा काढण्याचे आश्‍वासन ही त्यांनी दिले.

नगरपरियोजनेला विरोध करणाऱ्या शेतकऱ्यांनी श्री. पवार यांची भेट घेतली. श्री. पवार शुक्रवारी (ता. १७) नाशिक दौऱ्यावर आले असताना नगरपरियोजनेला विरोध करणाऱ्या शेतकऱ्यांनी त्यांची भेट घेत निवेदन दिले. 

स्थानिक शेतकऱ्यांचा योजनेला विरोध असताना बळजबरीने योजना लादली जात आहे. ज्या जागेवर योजना राबविली जाणार आहे, ती बागायती जमीन असून, फळांसह भाजीपाला मोठ्या प्रमाणात घेतला जातो. योजना शहरापासूनच्या दूर अंतरावर किंवा पडीक जमिनीवर राबविण्याची गरज असताना बागायती जमिनीवर राबविली जात आहे. या वेळी गोकुळ पिंगळे, सुरेश पाटील, पंडित तिडके, अरुण महाले, शरद फडोळ, नाना तिडके, संजय पिंगळे, वासुदेव तिडके, दिनेश बच्छाव, गणपत फडोळ आदी उपस्थित होते.