नवी दिल्ली : नाशिकमध्ये २२ जणांचे प्राण घेणाऱ्या ऑक्सिजन गळतीच्या दुर्घटनेमुळे संपूर्ण देश हादरला आहे. राष्ट्रपती रामनाथ कोविंद, पंतप्रधान नरेंद्र मोदींसह प्रमुख मान्यवरांनी या दुर्घटनेबद्दल चिंता व्यक्त करताना शोकाकूल कुटुंबीयांप्रती सहवेदना व्यक्त केल्या आहेत. 

राष्ट्रपती रामनाथ कोविंद यांनी ट्विटद्वारे या अपघातात बळी पडलेल्या कुटुंबीयांचे सांत्वन केले. महाराष्ट्रातील नाशिक येथे रुग्णालयात ऑक्सिजन गळतीमुळे रुग्णांच्या मृत्यूची दुर्दैवी घटना व्यथित करणारी आहे. या अपघातात आपल्या प्रियजनांना गमावणाऱ्या शोकाकूल कुटुंबीयांप्रती सहवेदना, अशा शब्दांत राष्ट्रपतींनी आपल्या भावनांना मोकळी वाट करून दिली. तसेच इतर सर्व रुग्ण लवकरात लवकर बरे होवोत, अशी प्रार्थनाही राष्ट्रपतींनी केली. तर उपराष्ट्रपती एम. वेंकय्या नायडू यांनी या शोकाकूल वातावरणात आपल्या प्रार्थना दिवंगत रुग्णांच्या कुटुंबीयांसोबत आहेत, अशा शब्दांत सांत्वना व्यक्त केली. 

पंतप्रधान नरेंद्र मोदींनीही या दुर्घटनेमुळे आपण व्यथित झाल्याची भावना व्यक्त केली. ऑक्सिजन सिलिंडर गळतीमुळे नाशिकच्या रुग्णालयात घडलेली शोकांतिका हृदय पिळवटून टाकणारी आहे. यातील जीवितहानी व्यथित करणारी असून, या दुःखाच्या प्रसंगात शोकाकूल कुटुंबीयांप्रती आपण सांत्वना व्यक्त करतो, असे भावनात्मक ट्विट पंतप्रधानांनी केले. 

दरम्यान, कोरोना संसर्ग झालेले काँग्रेस नेते राहुल गांधी यांनीही ट्विटद्वारे शोकाकूल कुटुंबीयांची सांत्वना व्यक्त करताना सर्वतोपरी मदतीसाठी महाराष्ट्र सरकारला आणि काँग्रेस कार्यकर्त्यांना आवाहन केले. नाशिकच्या झाकिर हुसेन रुग्णालयात रुग्णांच्या मृत्यूची बातमी मन हेलावणारी आहे. शोकाकूल कुटुंबीयांप्रती सहवेदना. राज्य सरकार आणि पक्ष कार्यकर्त्यांनी सर्वतोपरी साह्य करावे, असे मी आवाहन करतो, असे ट्विट राहुल गांधींनी केले.