जळगाव : खानदेशात गेली आठ ते १० दिवस ढगाळ वातावरण कायम आहे. यामुळे गहू पेरणी रखडत सुरू आहे. किमान तापमानात मोठी घटही झाली. याचा फटका रब्बी हंगामाला बसला आहे. 

तसेच थंडीचा अभाव, उष्णतेचा परिणाम,  यामुळे कोरडवाहू दादर ज्वारी, हरभरा क्षेत्रातील ओलावादेखील कमी झाला. किमान तापमान १७ अंश सेल्सिअसपर्यंत पोचले होते. तसेच दिवसादेखील उकाडा जाणवत होता. गव्हाची पेरणी गेल्या महिन्याच्या मध्यानंतर बऱ्यापैकी सुरू होती. खानदेशात यंदा सुमारे ३० ते ३५ हजार हेक्टरवर गहू पेरणी अपेक्षित आहे.

पूर्वहंगामी कापसाखालील क्षेत्रातही पेरणीला गती येईल, असे सांगितले जात होते. परंतु, प्रतिकूल वातावरणामुळे गहू पेरणी रखडली. गेल्या आठवड्यात पेरणीचा वेग मंदावला. 

जळगाव जिल्ह्यात सुमारे १२ हजार हेक्टरवर पेरणी पूर्ण झाली आहे. तर, धुळे व नंदुरबारातही सुमारे पाच हजार हेक्टरवर पेरणी झाल्याचा अंदाज आहे. जळगाव जिल्ह्यात रावेर, यावल, चोपडा, जामनेर या भागात अधिक पेरणी होईल. तर, धुळ्यातील शिरपूर, नंदुरबारमधील शहादा, तळोदा भागात पेरणी बऱ्यापैकी झाली आहे. पेरणीला गारठा वाढल्यास गती येईल. अनेक शेतकऱ्यांनी पेरणीसाठी क्षेत्रात मशागत करून घेतली आहे. 

थंडी वाढल्यानंतर पिके चांगली बहरणार

थंडी कमी असल्याने गेल्या महिन्यात पेरणी केलेल्या गहू पिकाच्या वाढीवरही काहीसा परिणाम दिसून आला. तसेच पीक पिवळसर झाले. पीक हवे तसे नसल्याने काही शेतकऱ्यांनी संप्रेरकांची फवारणी घेतली. तसेच खते देऊन सिंचनही करून घेतले. यामुळे पिकात सुधारणा दिसून आली. परंतु, थंडी वाढल्यानंतरच गहू पिकाची चांगली वाढ होईल.