पुणे : मराठवाडा, मध्य महाराष्ट्रात आणि कोकणात किमान तापमानात घट झाली आहे. परंतु, कोकण, मध्य महाराष्ट्राच्या काही भागांत कमी दाबाच्या पट्ट्यामुळे हवामान ढगाळ हवामान आहे. त्यामुळे किमान तापमानात चढ-उतार सुरू आहे. कोकण, मध्य महाराष्ट्राचा उत्तरेकडील काही भाग वगळता उर्वरित भागांत थंडीने चांगलाच जम बसविण्यास सुरवात केली आहे. गुरुवारी (ता. 21) सकाळी आठ वाजेपर्यंत उस्मानाबाद येथे 8.9 सेल्सिअस किमान तापमानाची नोंद झाली असल्याचे हवामान विभागाच्या सूत्रांनी सांगितले.

सध्या कोकण, गोव्यासह संपूर्ण राज्यात हवामान कोरडे आहे. कोकण, गोवा, मध्य महाराष्ट्र व विदर्भाच्या काही भागांत किमान तापमानात सरासरीच्या तुलनेत किंचित घट झाली. राज्याच्या उर्वरित भागांत किमान तापमान सरासरीच्या जवळपास होते. पुणे परिसरात गुरुवारी (ता. 21) आकाश अंशतः ढगाळ होते. आजही पुणे परिसरात आकाश अंशतः ढगाळ राहील. येत्या रविवारपयींत (ता. 24) पुणे परिसरात आकाश मुख्यतः निरभ्र राहणार असून, त्यानंतर हवामान ढगाळ राहील.

गेल्या दोन ते तीन दिवसांपासून मध्य महाराष्ट्र, मराठवाडा आणि विदर्भात थंडी आहे. किमान तापामानात सरासरीच्या तुलनेत चार अंशांपर्यंत घट झाली आहे. विदर्भानंतर, मराठवाडा, मध्य महाराष्ट्र आणि कोकणातही थंडी वाढत आहे. गेल्या दोन ते तीन दिवसांपासून मध्य महाराष्ट्र, मराठवाडा आणि विदर्भात थंडीचा चांगला जोर आहे.

गुरुवारी (ता. 21) सकाळी आठ वाजेपर्यंतचे किमान तापमान व कंसात झालेली घट (अंश सेल्सिअस) मुंबई (सांताक्रूझ) 20.0 (-1), अलिबाग 18.2, रत्नागिरी 18.8 (-1), डहाणू 17.7 (2), भिरा 15.0 (-2), पुणे 10.5 (1), जळगाव 10.0 (-1), कोल्हापूर 15.4 (1), महाबळेश्वर 13.6, मालेगाव 11.8, नाशिक 9.2.2 (-1), सांगली 12.2 (-1), सातारा 11.8 (-1), सोलापूर 11.6 (-3), औरंगाबाद 11.0, ,परभणी 10.7 (-2), नांदेड 11.0 (-2), उस्मानाबाद 8.9, अकोला 11.3 (-2), अमरावती 12.6 (-2), बुलडाणा 13.6, चंद्रपूर 12.6, गोंदिया 10.2 (-4), नागपूर 12.0 (-1), वर्धा 10.6 (-3, यवतमाळ 13.0 (-3)