अकोला ः मालेगाव तालुक्यातील शिरपूर जैन परिसरात मागील दोन-तीन वर्षांपासून कलिंगडाची शेती फायदेशीर फार्म्युला ठरत आहे. शेतकऱ्यांनी यावर्षात पावसाळ्यातही हे पीक घेत एक पाऊल पुढे टाकले आहे. बेमोसमी लागवड करीत हे शेतकरी चांगले दर कलिगंडाला मिळवू लागले आहेत. सध्या काढणी होत असलेले कलिंगड या वर्षात सर्वाधिक २२०० रुपये क्विंटल दराने विक्री झाले आहे. कलिंगडाचे पीक हे ६५ ते ९० दिवस या कालावधीत काढणीला येते. साधारणतः उन्हाळ्यात कलिंगडाची लागवड केली जाते. त्यामुळे या हंगातील क्षेत्र हे सर्वाधिक राहत असते. शिरपूर जैन (जि. वाशीम) परिसरातील शेतकऱ्यांनी पहिल्यांदा खरिपात कलिंगडाची लागवड करण्याचे धाडस केले. त्यात यशही मिळाले.  या वर्षी २५ जुलै ते १५ आॅगस्ट या काळात शिरपूर जैन परिसरात ४० ते ४५ एकरात कलिंगडाची लागवड झाली होती. या वर्षी अति पाऊस झाल्याने उत्पादना फटका बसला. तरी एकरी १५ ते २० टनांचे उत्पादन मिळाले. सरासरी दर ११०० ते २२०० दरम्यान मिळाले. काढणीनंतर पुन्हा २५ एकरापेक्षा अधिक क्षेत्रावर सप्टेंबर ते १५ ऑक्टोबरदरम्यान लागवड झाली. सध्या या प्लॉटमधून कलिंगडाची काढणी सुरू आहे. रविवारी (ता. १२) काढणी झालेल्या कलिंगडाला सर्वाधिक २२०० रुपये क्विंटलचा दर मिळाला. या हंगामातील उत्पादन हे २० ते ३० टनांपर्यंत राहिलेले आहे. कमी कालावधीत येणाऱ्या या पिकाकडे शेतकऱ्यांना कल असून, बिगर मोसमी लागवड करीत असल्यामुळे अधिक दर मिळत आहेत. दिल्लीला गेले कलिंगड शिरपूर जैन भागातील कलिंगड प्रामुख्याने दिल्ली बाजारपेठेत गेले आहे. व्यापाऱ्यांनी थेट खरेदी करीत हा माल नेला. साधारणतः ११०० रुपयांपासून २२०० रुपये प्रति क्विंटलचा दर शेतकऱ्यांना मिळाला आहे. या वर्षी ४४ गाड्या कलिंगड दिल्लीला गेले. शेतकऱ्यांना पीक पेरणीपासून तर काढणीपर्यंत एकरी ५० हजारांपर्यंत खर्च लागतो. प्रतिक्रिया कलिंगडाचे पीक कमी दिवसामध्ये येते. यंदा पावसाळ्यात दीड एकरात लागवड केली होती. एकरी १२ टन उत्पादन झाले. या कलिंगडात १५०० रुपये क्विंटलला दर भेटला. त्यानंतर याच जागेवर नवरात्रीमध्ये पुन्हा कलिंगडाची लागवड केली. एकरात १८ टन उत्पादन झाले. १८०० रुपये प्रतिक्विंटल दर मिळाला. आता त्या ठिकाणी खरबूज लागवड करणार आहे. -सुरेश गाभणे, कलिंगड उत्पादक, शिरपूर जैन, ता. मालेगाव, जि. वाशीम