सांगली ः ताकारी उपसा जलसिंचन योजनेच्या सुरू असलेल्या यंदाच्या तिसऱ्या आवर्तनाचे पाणी मुख्य कालव्याच्या ७५ किलोमीटरवर चिखलगोठण (ता. खानापूर) मध्ये पोहोचले आहे. हे पाणी कालव्याच्या शेवटचे गाव सोनी-भोसे (ता. मिरज) पर्यंत सोडले जाणार आहे, अशी माहिती कार्यकारी अभियंता प्रकाश पाटील यांनी दिली.

ताकारी योजनेच्या लाभ क्षेत्रात पाण्याची टंचाई लक्षात घेऊन योजनेच्या आवर्तनाचे नियोजन केले. सध्या उन्हाळ्याची तीव्रता अधिक असल्याने दुसरे आवर्तन बंद झाल्यानंतर आठच दिवसांनी म्हणजचे ९ मे पासून तिसरे आवर्तन सुरू केले. प्रारंभी कुंभारगाव ते वांगीपर्यंतच्या २२ किलोमीटर कालव्यावरील वितरिकांतून शेतीला पाणी देण्यात आले. नंतरच्या टप्प्यात प्रत्येकी २० ते २५ किलोमीटरच्या टप्प्यांत पाणी सोडून हे पाणी पंधरा दिवसांनी खानापूर तालुक्‍यात पोहोचले. दोन दिवसांपूर्वी ताकारीचे पाणी तासगाव तालुक्‍यातील चिखलगोठण गावाच्या पुढे आले आहे. आवर्तन सुरू असल्याने भूजलपातळी काहीशा प्रमाणात वाढली आहे.

कडेगाव, खानापूर, आणि तासगाव तालुक्‍यातील बहुतांश शेतीला आणि गावांना पाणी उपलब्ध होत आहे. गेल्या पंधरा दिवसांपूर्वी येरळा नदी कोरडी होती. सध्या हे पाणी तासगाव तालुक्‍यात आल्याने नदीच्या पात्रात पाणी आले आहे. त्यामुळे नदीकाठच्या शेतीला वेळेत पाणी मिळाले आहे. योजनेचे टप्पा क्रमांक एक साटपेवाडी बंधाऱ्यावरील आणि टप्पा क्रमांक दोन सागरेश्‍वमधील प्रत्येकी ११ पंप सुरु आहेत. मुख्य कालव्यातून हे पाणी १४४ किलोमीटरवर मिरज तालुक्‍यातील सोनी-भोसे परिसरात पोहोचल्याशिवाय बंद केले जाणार नाही. योजना ही अजून २० ते २५ दिवस सुरू ठेवली जाणार आहे.