सातारा ः जिल्ह्यात माॅन्सूनचे दमदार आगमन होऊनही जिल्ह्यातील काही गावांत पाणीटंचाई जैसे थे आहे. सध्या आठ तालुक्‍यांतील ४२ गावे ११२ वाड्या वस्त्यावरील ४४ हजार ८१ लोकसंख्येस ३५ टॅंकरद्वारे पाणीपुरवठा केला जात असल्याची माहिती जिल्हा परिषदेच्या पाणीपुरवठा यंत्रणेच्या सूत्रांनी दिली आहे.

जिल्ह्याचा अनेक भाग माॅन्सूनने व्यापला आहे. यामुळे खरिपातील पेरण्याची कामे सुरू झाली आहे. मात्र, असे असतानाही जिल्ह्यातील ४२ गावे तसेच ११२ वाड्यावस्त्यावर टॅंकरच्या पाण्यावर विसबून राहावे लागत आहे. माॅन्सूनच्या आगमनाने जिल्ह्यात नाममात्र आठ टॅंकरच्या संख्येत घट झाली आहे. जिल्ह्यातील आठ तालुक्‍यांत ४२ गावे ११२ वाड्या वस्त्यांवरील ४४ हजार ८१ लोकसंख्येस ३५ टॅंकरद्वारे पाणीपुरवठा केला जात आहे. यामध्ये माण तालुक्‍याला टंचाईच्या सर्वाधिक झळा सोसाव्या लागत आहे. या तालुक्‍यात सर्वाधिक सात टॅंकरद्वारे १३ गावे आणि ७१ वाड्यावस्त्यांवरील १५ हजार ८८८ लोकसंख्येस पाणीपुरवठा केला जात आहे.

खटाव तालुक्‍यातील आठ गावे व २८ वाड्यावस्त्यांवरील १५ हजार ३३८ लोकसंख्येस सहा टॅंकरद्वारे पाणीपुरवठा केला जात आहे. कोरेगाव तालुक्‍यात आठ गावांतील ३८२० लोकसंख्येस सहा टॅंकरद्वारे, खंडाळा तालुक्‍यातील एका गावातील ४१५ लोकसंख्येस एका टॅंकरद्वारे, वाई तालुक्‍यातील दोन गावे एका वाडीवस्तीवरील २६६१ लोकसंख्येस दोन टॅंकरद्वारे, पाटण तालुक्‍यातील एक गाव एका वाडीवस्तीवरील ५२५ लोकसंख्येस, जावली तालुक्‍यातील सात गावे नऊ वाडवस्त्यावरील ७५३० लोकसंख्येस दहा टॅंकरद्वारे व कराड तालुक्‍यातील दोन गावे व दोन वाड्यावस्त्यांवरील १७२४ लोकसंख्येस पाणीपुरवठा केला जात आहे. संरक्षित पाण्यासाठी ४० विहिरींचे अधिग्रहण करण्यात आले आहे. यामध्ये माण तालुक्‍यातील १२, खटाव १, कोरेगाव ८, फलटण ५, वाई ८, जावली ६ विहिरींचा समावेश आहे.