सोलापूर : राज्यातील दूध उत्पादकांना प्रतिलिटर २५ रुपये वाढीव दर देण्याचा निर्णय शासनाने जाहीर करून आज दहा दिवसांचा कालावधी उलटला; पण सोलापूर जिल्ह्यातील दूध संघ आणि खासगी दूध संघांकडून टोलवाटोलवी सुरू आहे. शिवाय हा दर देण्यासाठीही एसएनएफ आणि फॅटच्या अटी आणि पुन्हा तो कसा द्यायचा, याबाबतही साशंकता असल्याने दूध उत्पादकांच्या पदरी निराशा पडली आहे. त्यामुळे आणखी काही दिवस तरी दूध उत्पादकांना प्रतीक्षा करावी लागणार आहे.

सोलापूर जिल्ह्यात जिल्हा दूध संघ आणि खासगी दूध संघाकडून जवळपास १२ लाख लिटरपर्यंतचे संकलन होते. शासनाकडूनच अद्याप आमच्याकडे दराविषयी काहीच आलेले नाही, त्यामुळे आम्ही दर देऊ शकत नाही, असे दूध संघांतर्फे सांगितले जात आहे. २० जुलै रोजी शासनाने काढलेल्या परिपत्रकातील त्रुटी दुरुस्ती करण्याचे काम सध्या युद्धपातळीवर सुरू आहे. दूध दर कसा द्यायचा, यावरच दुग्धविकास विभाग गोंधळात आहे. त्यामुळेही या प्रक्रियेला वेळ लागत असल्याचे सांगण्यात येते. शासनाने जाहीर केलेल्या निर्णयानुसार ३.५ फॅट ते ८.५ एसएनएफ असणाऱ्या दुधालाच हा दर मिळणार आहे. ...तर कसा मिळेल दूधदर? गाईच्या दुधातील सर्वसाधारण नैसर्गिक फॅटचे प्रमाण हे २.५ ते ४.५, एसएनएफचे प्रमाण हे ७.५ ते ८.७, प्रोटिनचे प्रमाण हे ३३.५ टक्के ते ३४.५० टक्क्यांपर्यंत असते. हे सर्व घटक गाईची जात, वय, वेताचे दिवस आणि सर्वात महत्त्वाचे म्हणजे खाद्य या बाबींवर अवलंबून असतात. गाय कधीच ३.५ फॅट ते ८.५ एसएनएफ आणि ३४.५० टक्के अशा प्रकारे नैसर्गिकरीत्या दूध देत नाही, असे तज्ज्ञांचे मत आहे. त्यामुळे शासनाच्या निर्णयानुसार फॅट आणि एसएनएफचा विचार करता पुन्हा वाढीव दर मिळण्यात शेतकऱ्यांना अडचण येणार आहे.