सोलापूर : महात्मा गांधी राष्ट्रीय रोजगार हमी योजनेच्या कामावरील मजुरांचे वेतन १५ दिवसांच्या आत देण्याचा नियम आहे. मात्र मंगळवेढ्यातील मजुरांना तब्बल महिन्यापेक्षा अधिक कालावधी होऊनही मजुरीचे वेतन मिळाले नाही. त्यामुळे दुष्काळात मजुरांना काम उपलब्ध करून देण्याबाबत प्रशासनाची उदासीनता पहिल्या महिन्यातच दिसून येत आहे.

याबाबत महात्मा गांधी राष्ट्रीय रोजगार हमी योजनेतून तालुक्यात पंचायत, कृषी, सामाजिक वनीकरण खात्यातर्फे कामे सुरू आहेत. पंचायत समितीतर्फे घरकुल, तर कृषी विभागातर्फे फळबाग, शेततळ्यांची कामे करण्यात येत आहेत. सामाजिक वनीकरण विभागाने रस्त्याच्या कडेला दुतर्फा वृक्ष लागवड केली.

त्यासाठी काम केलेल्या मजुरांचे वेतन हे हजरीपत्रक भरल्यानंतर पंधराव्या दिवशी थेट बँक खात्यावर जमा करणे आवश्यक आहे, परंतु अद्यापही ते जमा झालेले नाही. पंचायत समिती, कृषी विभाग, जिल्हाधिकारी कार्यालयाने नागपूरच्या कार्यालयाला कळवूनही अजूनही १ आॅक्टोबरपासूनचे वेतन बँक खात्यावर जमा नाही.