बिजवडी, जि. सातारा : माण तालुक्यातील मागील दोन-तीन वर्षांत जलसंधारणाची कामे झाली. त्यामुळे दुष्काळी पट्ट्यात शेतीत आमूलाग्र बदल घडले. परंतु, यंदा परतीच्या पावसाने या दुष्काळी भागात हाहाकार माजवीत शेतीचे मोठे नुकसान केले. सतत संकटाचे घाव सोसणारा बळिराजा देशोधडीला लागला. अजूनही शेतात पाणी असल्याने पेरण्याचे नियोजन खोळंबले आहे. `वाफसा येईना अन् पेरणीचे ग्रहण सुटेना’, अशी स्थिती शेतकऱ्यांची झाली आहे. 

गेल्या दोन वर्षांपासून तालुक्‍यात पावसाचे प्रमाण वाढले. जलसंधारणाच्या कामामुळे पडणारे पाणी अडवून मुरले गेले. पाणीपातळीत वाढ झाली. त्याचा फायदा शेतकऱ्यांना झाला. शेतकरी आता कुठे यातून उभा राहत असताना पुन्हा एकदा अतिवृष्टीचे संकट आले. या संकटात खरीप हंगामाच्या शेवटी अतिवृष्टी झाल्याने हातातोंडाशी आलेलं पीक परतीच्या पावसाने हिरावले. त्यामुळे बळिराजा हतबल झाला. 

कांदा, बाजरी, मका, घेवडा व इतर पिकांचे अतोनात नुकसान झाले. खरीप पिकांचे झालेले नुकसान व शेतीची बिघडलेली गणिते सुधारण्यासाठी पुन्हा मोठ्या आशेने रब्बीच्या भरवशावर अवलंबून राहिला. ऑक्‍टोबरमध्ये रब्बीची पेरणी होणे गरजेचे होते.

पाऊस थांबून १५ दिवस झाले. परंतु, शेतात मोठ्या प्रमाणात पाणी साचल्याने वापसा येत नसल्याने पेरण्या खोळंबल्या आहेत. पावसामुळे खरीप वाया गेला आणि उशिरा पेरणीमुळे रब्बी हंगामही हातचा जाण्याच्या भीतीने बळिराजा धास्तावला आहे. 

ज्वारीची पेरणी केली होती. मात्र, अतिपावसामुळे दुबार पेरणीचे संकट ओढावले. अजूनही शेतात पाणी आहे. त्यामुळे मशागत करता येत नाही. आणखी किमान १५ दिवस तरी पेरणी करता येणार नाही.  - अर्जुन अवघडे, प्रगतशील शेतकरी, वावरहिरे, ता. माण.