कोल्हापूर : झेंडूच्या घसरत्या दराला गणेशोत्सवातही फारसे तारले नसल्याची स्थिती आहे. प्रचंड मागणी असलेल्या गणेशोत्सव काळातही झेंडूला किलोला केवळ ३० ते ४० रुपये इतका मर्यादित दर मिळत असल्याने झेंडू  उत्पादकांचा पूरता अपेक्षा भंग झाला आहे. दादरच्या फुलबाजारात जुन्नर, नाशिक, नारायणगाव आदी ठिकाणांहूनही फुलांच्या आवकेत वाढ झाली आहे. यामुळे झेंडूच्या दराचे ‘विघ्न` गणेशोत्सवातही कायम असल्याचे चित्र आहे.

निराशादायक हंगाम जुलै महिन्यापर्यंत फारशी मागणी नसल्याने झेंडूचे दर मंदीतच होते. ऑगस्टच्या मध्यापर्यंत दर दहा ते पंधरा रुपये प्रतिकिलो राहिले. आॅगस्टनंतर राज्यात सर्वत्र जोरदार पाऊस सुरू झाला. यामुळे राज्यभरातील फुलांचे नुकसान झाले. अचानक आवक कमी झाल्याने दरात काही काळ वाढ झाली. ऑगस्ट अखेरपर्यंत ४० ते ५० रुपये दर होते.

दरात फारसा उठाव नाही गणेशोत्सवामध्ये मुंबईत झेंडूची मागणी वाढते. यामुळे दर चांगले रहातील, असा कयास उत्पादकांबरोबर फुल विक्रेत्यांचाही होता. परंतु, सप्टेंबरच्या सुरवातीपासून दरात पडझड सुरू झाली. गणेशोत्सव सुरू होण्याच्या अगोदर चार दिवसांपर्यंत झेंडूची विक्री किलोस २० ते २५ रुपयांनी झाली. गणेशोत्सवासाठी मागणी सुरू झाल्यानंतर उत्पादकांनी फुलांची काढणी वेगाने सुरू केली. परंतु, दादरच्या बाजारात राज्यातील फूल उत्पादक पट्यातून फुलांची आवक सुरू झाल्याने आवक वाढलेलीच दिसली. सध्याचे दरच दिवाळीपर्यंत कायम राहू शकतील, अशी शक्‍यता व्यापारी सूत्रांनी व्यक्त केली.