पुणे : बारामती तालुक्यातील खासगी व निमशासकीय पशुवैद्यकीय सेवा देणाऱ्या डॉक्टरांनी बुधवारपासून ( ता. २२) बेमुदत संप पुकारला आहे. मागण्या मान्य पूर्ण होत नाहीत, तोपर्यंत पशुवैद्यकीय डॉक्टर संपावर असतील, अशी माहिती पशुवैद्यकीय, पशुसंवर्धन आणि दुग्ध व्यवस्थापन सेवा संघ बारामतीकडून देण्यात आली. 

राज्यातील सर्व खासगी व निमशासकीय पशुवैद्यकीय सेवा पुरवणाऱ्या लोकांना निबंधक एम. एस. व्हीसी विनाकारण नाहक त्रास देत आहेत. संविधानाने भारतीय पशुवैद्यक कायदा १९८४ च्या कलम ३० (ख) व कलम ५७ (१) बाबतीत दुर्लक्ष करून व वर्तमानपत्रात चुकीची माहिती प्रसारित केली. त्याद्वारे बदनामी करण्यात येत आहे. संघटनेच्या राज्य कार्यकारणीच्या वतीने वेळोवेळी संबंधित अधिकाऱ्यांना पत्रव्यवहार करून देखील कोणतीही दखल, खुलासा केला जात नाही. त्यामुळे  हा संप पुकारण्यात आला आहे.

मागण्या मान्य होईपर्यंत काम बंद 

‘‘संप पुकारल्यानंतर होणाऱ्या पशुधनाच्या नुकसानीस सर्वस्वी शासन जबाबदार राहील. खासगी व निमशासकीय पशुवैद्यकीय सेवा पुरवणारे शहर व तालुक्यात पशुवैद्यकीय, पशुसंवर्धन आणि दुग्ध व्यवस्थापन सेवा संघाचे उपाध्यक्ष डॉ. प्रशांत नालंदे, डॉ. रमजान तांबोळी, सचिव डॉ. विशाल घनवट यांच्यासह १५०डॉक्टर आहेत. हे सर्व संपावर गेले आहेत,’’ असे संघाचे अध्यक्ष डॉ. दत्तात्रेय भरणे यांनी सांगितले.