नाशिक : कृषी विज्ञान केंद्र, मालेगाव महाराष्ट्र शासन, पशुसंवर्धन विभाग आणि जिल्हा परिषद, पशुसंवर्धन विभाग यांच्या संयुक्त विद्यमाने प्रधानमंत्री नरेंद्र मोदी यांच्या हस्ते उद्‌घाटन झालेल्या राष्ट्रीय पशुरोग नियंत्रण कार्यक्रमांतर्गत -लाळ्या खुरकत, ब्रुसेलेसिस आणि राष्ट्रीय कृत्रिम रेतन कार्यक्रमाचे आयोजन मालेगाव तालुक्यातील जळगाव (निंबायती) येथे बुधवारी (ता. ११) करण्यात आले.  दरम्यान, कार्यक्रमाची सुरवात पंतप्रधान नरेंद्र मोदी यांच्या मथुरा (उत्तरप्रदेश) येथील उद्‌घाटनीय मार्गदर्शनाचे थेट प्रक्षेपण उपस्थित शेतकऱ्यांना दाखवून करण्यात आली. त्यानंतर गावातील जनावरांना लाळ्या खुरकत रोगाचे लसीकरण करण्यात आले. या कार्यक्रमासाठी गावातील शेतकरी मोठ्या संख्येने उपस्थित होते. या कार्यक्रमात सहायक आयुक्त (पशुसंवर्धन) डॉ. कदम यांनी लाळ्या खुरकत, ब्रुसेलेसिस आणि कृत्रिम रेतन या बाबत मार्गदर्शन केले. पंतप्रधान शेतकरी सन्मान निधी योजना, पंतप्रधान शेतकरी मानधन योजना याबाबत कृषी विज्ञान केंद्राचे प्रमुख अमित पाटील यांनी माहिती दिली. या कार्यक्रमाचे प्रास्ताविक व सूत्रसंचालन पशुविद्यान आणि दुग्धव्यवसाय विषय विशेषज्ञ संदीप नेरकर यांनी केले.