इस्लामपूर, जि. सांगली ः वाटेगाव-सुरूल शाखा ही देशाच्या सहकार क्षेत्रातील पहिली शाखा असून, या शाखेने १५ वर्षांत यशस्वी गाळप करीत आपले वेगळेपण जपले असल्याचे गौरवोद्गार कारखान्याचे संचालक दादासो मोरे यांनी काढले.

राजारामबापू पाटील सहकारी साखर कारखान्याच्या वाटेगाव - सुरूल  शाखेमध्ये श्री. मोरे यांच्या हस्ते रोलर  पूजन करण्यात आले. याप्रसंगी ते बोलत होते. या वेळी कारखान्याचे संचालक संचालक जे. वाय. पाटील, सचिव प्रताप पाटील, चीफ इंजिनिअर संताजी चव्हाण, चीफ केमिस्ट संभाजी सावंत प्रामुख्याने उपस्थित होते. प्रारंभी लोकनेते राजारामबापू पाटील यांच्या प्रतिमेचे पूजन करण्यात आले.

श्री. मोरे पुढे म्हणाले, की माजी मंत्री आ. जयंतराव पाटील यांच्या दूरदृष्टीतून ही शाखा उभी राहिली आहे. या शाखेतील ऑफ सिझनची कामे गतीने सुरू आहेत.  या शाखेसाठी या गळीत हंगामासाठी साडेसात हजार एकर उसाची नोंद झाली आहे. वाहतूक व तोडणी करार पूर्ण झाले आहेत.

सचिव प्रताप पाटील यांनी स्वागत व प्रास्ताविक केले. याप्रसंगी संजय मोरे रेठरे हरणाक्ष, आकाराम साळुंखे सुरूल यांच्यासह अधिकारी, खातेप्रमुख, कर्मचारी उपस्थित होते. चीफ इंजिनिअर संताजी चव्हाण यांनी आभार मानले.