तिसगाव, जि. नगर : ऊस चाऱ्याचे भाव अचानक तिसगाव (ता. पाथर्डी) येथे वाढविल्याने संतप्त झालेल्या शेतकऱ्यांनी आक्रमक होत विक्री बंद पाडली. युवा नेते भाऊसाहेब लवांडे यांच्या मध्यस्थीनंतर उसाचे दर कमी केल्यावर पुन्हा विक्री सुरू झाली. 

बारामती, लोणंद, आळेफाटा येथून खासगी व्यापारी तिसगाव येथे ऊस चारा विक्रीसाठी आणतात. दुष्काळी परिस्थितीमुळे चाऱ्यासाठी उसाला मोठी मागणी आहे. साधारण साडेतीन हजार रुपये टनाप्रमाणे विकल्या जाणाऱ्या उसाला दोन दिवसांपासून अचानक पाच हजार रुपये सांगितले जाऊ लागले. त्यामुळे शेतकऱ्यांनी संताप व्यक्त केला. आज सकाळी बाजारात जाऊन शेतकऱ्यांनी उसाचे दर कमी करण्याची विनंती केली. मात्र खर्च वाढल्याचे सांगत विक्रेत्यांनी शेतकऱ्यांच्या मागणीला प्रतिसाद दिला नाही. त्यामुळे शेतकऱ्यांनी आक्रमक होत आंदोलनाची भूमिका घेतली. 

उसाचे भाव कमी होईपर्यंत विक्री होऊ देणार नाही, असा इशारा दिला. भाऊसाहेब लवांडे यांना शेतकऱ्यांनी बोलाविले. व्यापाऱ्यांनी ठरवून दरात मोठी वाढ केल्याचे त्यांच्या निदर्शनास आणून दिले. लवांडे यांनी ऊसविक्रेते व शेतकऱ्यांची भूमिका ऐकून घेत भाव कमी करण्याची सूचना ऊसविक्रेत्यांना केली. त्यानंतरही काही विक्रेते भाव कमी करण्यास तयार नव्हते. त्यामुळे संतप्त शेतकरी व लवांडे यांनी चढ्या भावाने ऊसविक्री करायची असल्यास, तुमची वाहने येथे उभी राहू देणार नाही, तसेच चाराविक्री करू देणार नाही, असा इशारा दिला.

त्यानंतर विक्रेते नरमले. लवांडे यांच्या आक्रमक भूमिकेनंतर ३८०० ते ४००० रुपये टनाप्रमाणे विक्री करण्यास तयार झाले. विक्रेत्यांचा तोटा होणार नाही, तसेच शेतकऱ्यांचीही लूट होणार नाही, या पद्धतीने चाऱ्याचे दर ठरविले जावेत, अशी सूचना लवांडे यांनी केली.