सोलापूर : राज्यातील महसूल प्रशासनाची यंत्रणा दिवसेंदिवस हायटेक होत आहे. राज्यातील तलाठी व मंडलाधिकाऱ्यांना लॅपटॉप आणि प्रिंटर देण्याचा निर्णय राज्य सरकारने घेतला आहे. त्यानुसार सोलापूर जिल्हा प्रशासनाची लॅपटॉप व प्रिंटर खरेदीची प्रक्रिया अंतिम टप्प्यात आहे. येत्या १५ दिवसांमध्ये जिल्ह्यातील ४४८ तलाठी व मंडलाधिकाऱ्यांना लॅपटॉप व प्रिंटरचे वाटप होणार आहे.

जिल्हा प्रशासनाच्या वतीने अत्याधुनिक लॅपटॉप व प्रिंटर खरेदीसाठी प्रयत्न आहेत. नामांकित एचपी कंपनीचे आय-५, ८-जनरेशनचे लॅपटॉप देण्यात येणार आहेत. जिल्ह्यात ६४३ तलाठी व मंडलाधिकारी आहेत. या सर्वांना दोन टप्प्यात लॅपटॉप व प्रिंटर देण्यात येणार आहेत. जिल्हा नियोजन समितीच्या माध्यमातून अडीच कोटी रुपयांची ही खरेदी प्रक्रिया राबविली जात आहे.

पहिल्या टप्प्यात ४४८ लॅपटॉप व प्रिंटर दिल्यानंतर उर्वरित १९५ लॅपटॉप व प्रिंटर खरेदीसाठी साधारणतः सव्वा कोटी रुपयांच्या निधीची आवश्‍यकता भासणार आहे. हा निधी जिल्हा नियोजन समिती अथवा राज्य सेतू समितीच्या माध्यमातून उपलब्ध करण्याचा प्रशासनाचा प्रयत्न असणार आहे. सात-बारा व फेरफारची कामे आता ऑनलाइन झाल्यामुळे तलाठी व मंडलाधिकारी यांचे काम येत्या काळात अधिक सोपे होणार आहे.