परभणी ः गंगाखेड शुगर्स साखर कारखान्याने गेल्या वर्षी जाहीर केलेली २ हजार २०० रुपये ऊसदराची रक्कम जिल्ह्यातील उर्वरित शेतकऱ्यांना तत्काळ देण्यात यावी, या मागणीसाठी स्वाभिमानी शेतकरी संघटनेतर्फे मंगळवारी (ता. ११) जिल्हाधिकारी कार्यालयासमोर बेमुदत उपोषण सुरू करण्यात आले.

माखणी (ता. गंगाखेड) येथील गंगाखेड शुगर्स साखर कारखान्याने गतवर्षी (२०१७) जिल्ह्यातील शेतकऱ्यांचा ऊस नेत असताना प्रतिटन २ हजार २०० रुपये दर देऊ असे जाहीर केले होते. काही शेतकऱ्यांच्या उसाला सुरवातीला २ हजार रुपये प्रतिटन दर देण्यात आला. तर उर्वरित शेतकऱ्यांना १ हजार ५०० रुपये दर देण्यात आला. शासन निर्णयानुसार १४ दिवसांच्या आत एक रकमी एफआरपी देणे बंधनकारक आहे. परंतु, या गतवर्षी जाहीर केल्यानुसार शेतकऱ्यांना दर दिलेला नाही.

कारखान्याने शेतकऱ्यांना गतवर्षीचे बिल एफआरपी प्रमाणे द्यावे, या मागणीसाठी स्वाभिमानीचे जिल्हाध्यक्ष किशोर ढगे, केशव आरमळ, डिगांबर पवार, दीपक भालेराव, भास्कर खटींग अन्यायग्रस्त शेतकरी मंगळवारी (ता. ११) जिल्हाधिकारी कार्यालयासमोर बेमुदत उपोषणास बसले आहेत.