चापोली, लातूर (प्रतिनिधी) : उन्हाळा सुरु झाला की रसवंतीगृहांवर दिवसभर गर्दी पहावयास मिळते. त्यामुळे येथील काही बेरोजगार तरुण दरवर्षी हा व्यवसाय सुरु करतात. मात्र, ‘कोरोना’चा देशात शिरकाव झाला आणि लाकडाऊन जाहीर झाला. त्यामुळे ग्रामीण भागातील रसवंतीसह इतर व्यवसाय बंद पडले. रसवंतीसाठी लागवड केलेला ऊस सध्या शेतातच उभा आहे. त्यामुळे शेतकऱ्यांना याचा फटका बसत आहे. 

येथील नारायण काचे व त्याचे कुटुंबीय गेल्या पाच, सहा वर्षांपासून शेतात एक एकरवर उसाची लागवड करतात. ऊस कारखान्याला न देता त्याचे मूल्यवर्धन करून अधिक नफा मिळवण्यासाठी त्याचा रसवंतीसाठी ते उपयोग करतात. येथील प्राथमिक आरोग्य केंद्राच्या जवळ महामार्गाशेजारील आमराईत त्यांनी स्वतःचे रसवंती गृह सुरु केले आहे. दाट सावली असल्याने प्रवाशी वाहने थांबवून ताज्या रसाचा आस्वाद घेत होते. चापोली येथील ग्रामस्थही सायंकाळच्या वेळेला रसाचा आस्वाद घेण्यासाठी येथे येतातच. मात्र, यंदा हंगाम सुरु होण्याअगोदरच पडला. 

काचे यांनी जून महिन्यात उसाची लागवड केली होती. यासाठी त्यांना साधारण ६० हजार रुपयांचा खर्च आला. त्यांना दरवर्षी फेब्रुवारी ते जून या पाच महिन्यात साधारण चार ते पाच लाखाचे उत्पन्न रसवंती गृहातून मिळते. नारायण स्वतः त्याचे वडील व दोन भाऊ काम तिथे करतात. मात्र लॉकडाऊनमुळे हा व्यवसाय बंद पडला आहे.

सध्या ऊस तोडणीस आला आहे. लॉकडाऊनमुळे आता उसाचे काय करायचे, असा एकच प्रश्न त्यांच्यासमोर आहे. काचे यांच्या प्रमाणेच शेतमालाचे मूल्यवर्धन करणाऱ्या असंख्य शेतकऱ्यांचे ‘कोरोना’मुळे आर्थिक गणितच बिघडल्याचे चित्र आहे.