पुणे ः आॅक्टोबर महिन्यापासून सुरू झालेल्या पाणी टंचाईमुळे शेतकऱ्यांसमोर संकट उभे राहिले आहे. त्याचा परिणाम ऊस लागवडीवर झाला आहे. सध्या पुणे विभागात पुरेसे पाणी उपलब्ध नसल्याने अनेक ठिकाणी ऊस लागवडी ठप्प झाल्या आहेत. विभागात अवघ्या एक लाख एक हजार ९७० हेक्टरवर ऊस लागवडी झाल्या असल्याचे चित्र आहे.

यंदा जून महिन्यापासून पावसाचे प्रमाण अत्यंत कमी राहिले आहे. विभागातील मावळ, मुळशी, भोर, वेल्हा आणि संगमनेर, अकोले या तालुक्यात बऱ्यापैकी पाऊस झाला. त्यामुळे काही प्रमाणात धरणातील पाणीसाठ्यात वाढ झाली होती. परंतु परतीच्या पुरेसा पाऊस न झाल्याने भूजल पातळीत वाढ झाली नाही.

परिणामी आॅक्टोबरपासून पुणे विभागातील बहुतांशी तालुक्यात टँकरने पाणीपुरवठा सुरू झाला आहे. आगामी काळात पाण्याची भीषण परिस्थिती उद्भवण्याची शक्यता आहे. त्यामुळे शेतकऱ्यांनी आत्तापासूनच सावध भूमिका घेत पुढील काळातील पाणीटंचाई गृहीत धरून शेतकऱ्यांनी ऊस लागवडी करण्याचे सोडून दिले आहे. त्याचा साखर कारखान्यांच्या पुढील हंगामावर मोठा परिणाम होण्याची शक्यता आहे.

पुणे विभागातील नगर, पुणे आणि सोलापूर ही जिल्हे उसाचे आगार म्हणून राज्यात ओळखली जातात. विभागात उसाचे सरासरी चार लाख १३ हजार ५८० हेक्टर क्षेत्र असून शेतकरी आडसाली, पूर्व हंगामी आणि सुरू अशा प्रकारच्या उसाची टप्प्याटप्प्याने लागवड करतात. यंदा पावसाळ्याच्या सुरवातीपासून कमी पाऊस झाला. त्यामुळे आडसाली उसाच्या अवघ्या ८८ हजार ७१० हेक्टरवर लागवडी झाल्या आहेत.

यामध्ये नगर जिल्ह्यात अवघे ३३ हजार २००, पुणे जिल्ह्यात ३३ हजार ५२० आणि सोलापूर जिल्ह्यात २२ हजार हेक्टरवर आडसाली उसाची लागवड झाली आहे. पूर्व हंगामी ऊसाची १३ हजार २६० हेक्टरवर लागवड झाली आहे. यामध्ये नगर जिल्ह्यात सहा हजार २६०, पुणे जिल्ह्यात ७६०, सोलापूरमध्ये ६ हजार २४० हेक्टरवर लागवड झाली आहे.