लातूर ः राज्यातील दूध उत्पादक शेतकरी दररोज राज्य परिवहन महामंडळाच्या बसमध्ये वाहतूक करून शहरी भागात दूध आणून त्याची विक्री करतात. अनेक जणांचा व त्यांच्या कुटुंबीयांचा यावर उदरनिर्वाह चालतो. अशा दूध उत्पादकांना एस. के. ट्रान्सलाइन्स प्रा. लि.कडून पासही दिले जात होते. पण या कंपनीने नियमाचे उल्लंघन केले आहे. त्यामुळे महामंडळाने त्यांच्यावर कारवाई करत दूध व दुग्धजन्य पदार्थांची वाहतूक करण्यास मनाई केली आहे. त्यामुळे राज्यातील दूध उत्पादक अडचणीत आले आहेत. महामंडळाच्या भूमिकेकडेच आता त्यांचे लक्ष लागले आहे.   राज्य परिवहन महामंडळाच्या बसमधून पार्सल कुरिअरची वाहतूक करण्यासाठी महामंडळाने एस. के. ट्रान्सलाइन्स प्रा. लि. या कंपनीशी करार केला आहे. एक नोव्हेंबर २०११ ते ३१ आक्टोबर २०१८ या कलावधीसाठी अधिकृत परवानाधारक म्हणून महामंडळाने या कंपनीची नियुक्ती केली होती. तसा करारही करण्यात आला होता.  पण सांगली विभागाने एक अहवाल महामंडळास सादर केला होता. यात जास्तीत जास्त पाचशे किलो पार्सल वाहतुकीची मर्यादा असताना दोन वेळा सहाशे किलो पार्सलची वाहतूक करणे, जास्ती जास्त ५० हजार एवढ्या किमतीच्या मालाची एकावेळी वाहतूक करण्याची मर्यादा असतानाही त्या पेक्षाही जास्त किमतीच्या पार्सलची वाहतूक करणे, डॉकेटमध्ये जाणीवपूर्वक खोट्या नोंदी करून अधिक किमतीच्या मालाची वाहतूक करणे, नाशवंत मालाची वाहतूक करताना सदर मालाच्या बांधणीच्या अानुषंगाने असलेल्या नियमांचे पालन न करणे असे प्रकार दिसून आले आहेत.