पुणे : राज्यातील पुणे, नगर, जालना, यवतमाळ, चंद्रपूर जिल्ह्यात शनिवारी (ता. २८) काही ठिकाणी वादळी वाऱ्यासह पूर्वमोसमी पावसाने हजेरी लावली आहे. दुपारनंतर ढगांची निर्मिती होऊन, जोरदार वारे, मेघगर्जनेसह वळीव स्वरुपाचा पाऊस पडत आहे. या पावसामुळे गहू, हरभऱ्यासह, चारा पिके, फळबागांचे नुकसान होत आहे. रविवारी (ता. २९) दुपारनंतर नगर जिल्ह्यातील राहुरी, नेवासा, नगर तालुक्याच्या काही भागात वादळी वाऱ्यासह पावसाला सुरवात झाली होती. बुलडाणा शहरात गारपीटसह पाऊस पडला, तर पुण्यातही पावसाने हजेरी लावली. 

जालना जिल्ह्यातील अंकूशनगर परिसरात शनिवारी (ता. २८) पावसाने जोरदार हजेरी लावली. महिन्याभरात चौथ्यांदा पडलेल्या पावसाने गहू, हरभरा, ज्वारी रब्बी पिकांचे नुकसान झाले, त्याचबरोबर फळबागांनाही वादळी पावसाचा फटका बसला. वडीगोद्री परिसरात झालेल्या पावसाने टरबूजाला तडाखा दिला असून, कांदा पिकांचेही नुकसान झाले आहे. 

पुणे शहर आणि जिल्ह्यात शनिवारी दुपारनंतर जोरदार वाऱ्यासह पावसाला सुरवात झाली. काही ठिकाणी सुमारे तासभर पावसाच्या सरी सुरू होत्या. जोरदार वाऱ्यामुळे शहरात अनेक झाडे तुटली, तर सखल भागात पाणी साचले. पुणे शहर, हवेली तालुक्यासह जिल्हात विविध ठिकाणी हलक्या स्वरुपाचा पाऊस पडला. विदर्भातील यवतमाळ, चंद्रपूर जिल्ह्यात शनिवारी जोरदार पाऊस पडला. यवतमाळमधील वणी, झरी झामणी, नेर तर चंद्रपूर येथील जेवती, कोर्पणा येथे प्रत्येकी १० मिलिमीटर पावसाची नोंद झाल्याचे हवामान विभागातर्फे सांगण्यात आले.