मुंबई : राज्य कृषी मुल्य आयोगाचे अध्यक्ष पाशा पटेल यांच्यासह आठ सदस्यांच्या नियुक्त्या रद्द करण्यात आल्या आहेत. राज्य सरकारने तसे आज (ता.२) परिपत्रक काढले असून भाजप सरकारच्या काळात या नियुक्त्या करण्यात आल्या होत्या. 

राज्यातील शेतमालाला किफायतशीर भाव मिळावेत व ग्राहकांसाठी वाजवी दरात शेतमाल खरेदी करता यावा या दुहेरी उद्येशाने २३ एप्रिल २०१५ रोजी ‘राज्य शेतमाल भाव समितीचे राज्य कृषी मूल्य आयोग’ मध्ये रुपांतर करण्यात आले होते. सदर राज्य कृषी मूल्य आयोगावर शेतकरी नेते पाशा पटेल यांची अध्यक्ष म्हणून नियुक्ती तत्कालीन भाजप सरकारने केली होती. 

अध्यक्षांसह आठ सदस्यांच्याही नियुक्त्याही रद्द करण्यात आल्या आहेत. या सदस्यांत प्रा. सुहास पाटील (सोलापूर), अनिल पाटील (पालघर), प्रशांत इंगळे (वर्धा), किशोर देशपांडे (औरंगाबाद), अच्युत गंगणे (बीड), डॉ.संपतराव पाटील (कोल्हापूर), विनायक जाधव (सांगली), शिवनाथ जाधव (नाशिक) यांचा समावेश आहे.