सोलापूर ः चारा छावणीच्या धर्तीवर संस्थांच्या माध्यमातून जागोजागी कोरोना क्वरांटाइन व मदत केंद्रे सुरू करावीत, अशी मागणी किसान आर्मी व वॅाटर आर्मीचे संस्थापक प्रफुल्ल कदम यांनी शासनाकडे निवेदनाद्वारे केली आहे. 

सध्या कोरोना बचाव मोहीम ही केवळ प्रशासकीय मोहीम झाली आहे. यामध्ये राजकीय, सामाजिक, व्यापारी आणि इतर घटकांचा सहभाग नाही. त्यामुळे कोरोनाची समस्या दिवसेंदिवस चिंताजनक होत चालली आहे. त्यामध्ये संस्थांची मदत घेतल्यास मोठा हातभार लागणार आहे. त्यामुळे प्रशासनाचा भारही बऱ्यापैकी कमी होणार आहे. साहजिकच रुग्णांबरोबर नागरिकांचीही सोय होईल, जागोजागी क्वरांटाइन केंद्र आणि मदत केंद्रांच्या स्वतंत्र यंत्रणेमुळे भविष्यातील धोकाही कमी होऊ शकेल. 

सध्या सगळीकडे वैद्यकीय सुविधा देण्यासाठी डॅाक्टर्स, नर्स किंवा अन्य कर्मचाऱ्यांची संख्या तुलनेने कमीच आहे. त्यामुळे रुग्ण वाढले, तर त्याचे व्यवस्थापन कसे होणार, त्यासाठी त्या-त्या भागातील या केंद्रामुळे मोठी मदत होईल, ते कसे होईल, याचा मसुदाही या निवेदनासोबत श्री. कदम यांनी जोडला आहे. तसेच आरोग्यमंत्री राजेश टोपे यांच्याशीही आपण बोलले असल्याचे ते म्हणाले.