जळगाव : खानदेशातील तापी नदीकाठच्या काळ्या कसदार जमिनीत कोरडवाहू रब्बी पिकांमध्ये दादर (ज्वारी) व हरभऱ्याची पेरणी सुरू झाली आहे. गिरणा पट्ट्यात अजून पेरणी सुरू झालेली नसल्याचे चित्र आहे. खानदेशात दादर, हरभरा, मका मिळून सुमारे १२ ते १३ हजार हेक्‍टवर पेरणी झाल्याचा अंदाज आहे.

हवेतील आर्द्रतेवर येणारे पीक म्हणून दादरची ओळख आहे. त्याची पेरणी खानदेशात तापी काठावरील तालुक्‍यांमध्ये अधिकची असते. तसेच पाचोरा, भडगाव व चाळीसगाव भागातही पेरणी केली जाते. यंदा पारोळा पश्‍चिम व उत्तर, शिंदखेडा व अमळनेरातील पूर्व, दक्षिण भागात हंगाम बिकट आहे. भडगाव व चाळीसगावमधील धुळ्याकडील भागातही स्थिती बिकट आहे. विहिरींचे पाणी खोल गेल्याने गव्हाची पेरणी अपेक्षित होणार नाही. चोपडा, रावेर, यावल, शिंदखेडा, जळगाव व अमळनेरचा तापीकाठ, शहादा, तळोदा, मुक्ताईनगर, भुसावळ या तालुक्‍यांमध्ये रब्बीची बऱ्यापैकी पेरणी होईल. अन्य कृत्रिम जलसाठ्याच्या भागातही पेरणी होईल. दादरची पेरणी चोपडा, जळगाव, शिंदखेडामधील तापीकाठ आदी भागात झाली आहे. काही ठिकाणी तर ज्वारीचे पीक तरारले आहे. हरभरा पेरणी या आठवड्यात काही भागात सुरू झाली आहे. शासकीय महामंडळाच्या हरभरा बियाण्याला शेतकऱ्यांची पसंती आहे.  चारा व धान्य देणारे पीक म्हणून यावल, जळगाव भागात काही शेतकऱ्यांनी मका लागवडही सुरू केली आहे.

मक्‍याची लागवड पुढे वाढेल. सध्या फारशी लागवड नाही. काही शेतकऱ्यांनी उडीद, मूग व आता सोयाबीनच्या रिकाम्या झालेल्या क्षेत्रात लागवड केली आहे. ज्वारीची सुमारे पाच ते सहा हजार हेक्‍टवर पेरणी आटोपल्याची माहिती आहे. मक्‍याची तीन ते साडेतीन हजार हेक्‍टरवर पेरणी झाली आहे. हरभऱ्याचीदेखील सुमारे अडीच ते तीन हजार हेक्‍टवर पेरणी झाल्याचा अंदाज आहे.