सोलापूर : कोरोना विषाणूच्या पार्श्वभूमीवर महत्त्वाच्या शहरांतील सोसायट्यांत पुरविण्यासाठी कृषी तंत्रज्ञान व्यवस्थापन यंत्रणेने (आत्मा) पुढाकार घेतला आहे. जिल्ह्यातील शेतकरी, शेतकरी गट, शेतकरी कंपनी यांच्याकडे उपलब्ध भाजीपाला, फळभाज्यांच्या नोंदी करून आधी सोलापूर आणि त्यानंतर प्रमुख बाजारपेठा असलेल्या पुणे, मुंबईकडे पुरवठा करण्याचे नियोजन केले आहे.    गेल्या दोन दिवसांपासून पुणे, मुंबईच्या बाजार समितीतील व्यवहार विस्कळीत झाले आहेत. सोलापुरातही अशीच स्थिती आहे. शिवाय गर्दीही होऊ द्यायची नाही, अशी परिस्थिती असल्याने सोलापुरातून सोलापूरसह पुणे, मुंबईतील प्रमुख सोसायट्यांमध्ये शेतकरी गट, शेतकरी कंपन्याकंडून थेट भाजीपाला आणि फळभाज्या पुरवठा करता येऊ शकतो, याचे नियोजन करण्यात येत आहे.  जिल्हा अधीक्षक कृषी अधिकारी बसवराज बिराजदार, आत्माचे प्रकल्प उपसंचालक मदन मुकणे यांनी त्यासाठी तालुकास्तरावरील आत्माचे व्यवस्थापक आणि सहायक व्यवस्थापकांना त्यांच्या त्यांच्या भागातील शेतकरी गट, शेतकरी कंपन्यांशी संपर्क करून उपलब्ध भाजीपाला, फळे, फळभाज्यांची यादी करण्याचे काम सुरू केले आहे. शेतकरी गट, कंपनी, पुरवठा होऊ शकणारा भाजीपाला, फळभाज्या, त्याचा दर यासंबंधीची माहिती असणारा फॅार्मच शेतकरी गट आणि कंपन्यांना दिला आहे. या माध्यमातून शेतकऱ्यांना शेतमाल विक्रीची व्यवस्था निर्माण झाली आहे.