सोलापूर : लोकसभेच्या आधी जिल्ह्यातील आठ ग्रामपंचायती व तीन सरपंचपदांसाठी रविवारी (ता. २४) निवडणूक होत आहे. या निवडणुकीत मतदानावेळी मतदारांच्या डाव्या बोटाऐवजी उजव्या बोटास शाई लावावी, असा आदेश निवडणूक आयोगाने दिला आहे. त्यानुसार जिल्हा प्रशासनाने ग्रामपंचायतीच्या निवडणूक अधिकाऱ्यास तशा सूचना दिल्या आहेत. 

लोकसभा निवडणुकीची धामधूम सध्या जोरात सुरू आहे. त्याच धामधुमीत आता गाव स्तरावरील या आठ गावांतही प्रचाराचा जोर सुरू आहे. पक्षीय पातळीपेक्षा गाव स्तरावरील गटातटातच या गावात निवडणुका रंगल्या आहेत. त्यामुळे ऐन दुष्काळातही प्रचाराचा तोफा चांगल्याच कडाडत आहेत. या निवडणुकासाठी प्रशासनानेही योग्य ते नियोजन केले. 

बार्शी तालुक्‍यातील ताडसौंदणे, माढा तालुक्‍यातील वेणेगाव व उजनी टें., पंढरपूर तालुक्‍यातील लोणारवाडी, अक्कलकोट तालुक्‍यातील कल्लपावाडी, सातन दुधनी व संगोगी ब, तर मंगळवेढ्यातील शिवणगीचा समावेश आहे. याशिवाय अक्कलकोट तालुक्‍यातील दहिटणे, दक्षिण सोलापुरातील  मंद्रूप, मंगळवेढ्यातील नंदूर ग्रामपंचायतींच्या सरपंचपदासाठीही मतदान होणार आहे.