सोलापूर : महात्मा जोतिराव फुले शेतकरी कर्जमुक्ती योजनेसाठी लाभ द्यावयाच्या शेतकऱ्यांच्या यादीचे सोलापूर जिल्हा मध्यवर्ती सहकारी बॅंकेचे काम पूर्ण झाले आहे. जिल्हा बॅंकेकडील थकबाकीदार शेतकऱ्यांची माहिती तपासून तयार झाली आहे. सुमारे ४३ हजार ४०६ शेतकऱ्यांची माहिती लेखापरीक्षकांच्या माध्यमातून पडताळण्यात आली आहे. फेब्रुवारीपासून पोर्टलवर अपलोडिंगचे काम सुरू होणार आहे. 

जिल्ह्यात असलेल्या एक हजार २७९ विविध कार्यकारी सेवा सहकारी संस्थांपैकी ११८० संस्थांतील शेतकरी या योजनेच्या लाभासाठी पात्र ठरले आहेत. शेतकऱ्यांची माहिती पडताळण्यासाठी जिल्ह्यात ५५ लेखापरीक्षकांची नियुक्ती करण्यात आली होती. जिल्ह्यातील राष्ट्रीयीकृत बॅंकांची माहिती त्यांच्या विभागीय कार्यालयाच्या वतीने सरकारला पाठविण्यात येणार आहे.

जिल्हा बॅंकेची माहिती मात्र जिल्हा उपनिबंधक कार्यालयाच्या माध्यमातून सरकारला पाठविण्यात येणार आहे. त्यादृष्टीने जिल्हा प्रशासन आणि सहकार निबंधक कार्यालयाने योजना जाहीर झाल्यापासून सातत्याने पाठपुरावा आणि बैठका घेत गतीने काम केले.

राज्यात सोलापूर आघाडीवर

आता कर्जमुक्‍तीच्या लाभार्थ्यांची नावे आणि त्यांच्या रकमा याची सर्व माहिती सध्या तयार झाली आहे. त्याची पडताळणीही पूर्ण झाली आहे. त्यामुळे राज्यातील अन्य जिल्ह्यांच्या तुलनेत सोलापूर जिल्ह्याचे काम लवकर पूर्ण होण्याची शक्‍यता आहे.