परभणी : जिल्ह्यात यंदाच्या हंगामात सद्य:स्थितीत कापूस वेचणीसाठी मजुरांची वाणवा आहे. त्यामुळे बोंडातून फुटलेला कापूस झाडावरच उन्हात वाळत आहे. परिणामी, वजनात घट येऊन शेतकऱ्यांचे नुकसान होत आहे. फुटलेल्या बोंडातील कापूस जमिनीवर गळून पडत आहे. मजुराअभावी वेचणीसाठी विलंब होत असल्याने एकापाठोपाठ सर्वच बोंडे फुटली आहेत. त्यामुळे अनेक ठिकाणी एकाच वेचणीमध्ये कापूस हंगाम संपण्याची चिन्हे आहेत.

यंदा जिल्ह्यात २ लाख हेक्टरवर कपाशीची लागवड झाली. सुरवातीच्या काळात वाढीयोग्य पाऊस झाल्याने कपाशीची पीक परिस्थिती समाधानकारक होती. गतवर्षीच्या तुलनेने गुलाबी बोंड अळीचा प्रादुर्भावदेखील कमी होता. परंतु, सप्टेंबर-ऑक्टोबर महिन्यांतील सततचा पाऊस आणि अतिवृष्टीमुळे कपाशीच्या पहिल्या बहाराच्या बोंडाचे अतोनात नुकसान झाले.

पाणी साचून राहिलेल्या शेतातील बोंडे सडली. फुटलेल्या कापसाची वेचणी न करता आल्यामुळे पावसात भिजून सरकीला कोंब फुटले. पावसाने उघडीप दिल्यानंतर सोयाबीनची सुगी, रब्बीची पेरणी यासोबतच कापूस वेचणीची कामे एकाच वेळी सुरू झाली. त्यात कापूस वेचणीसाठी मजुरांची कमतरता आहे.गतवर्षी सुरुवातीला कापूस वेचणीसाठी मजुरीचे दर प्रतिकिलोला ४ ते ५ रुपये होते. यंदा वेचणीचे दर ६ ते ८ रुपये प्रतिकिलो पर्यंत वाढले आहेत.

काही भागांत त्यापेक्षाही जास्त दर आहेत. नुकसान टाळण्यासाठी मजुरीचे दर वाढवून देण्यास अनेक शेतकरी तयार आहेत. परंतु, एकाचवेळी अनेक शेतीकामे सुरू असल्याने कापूस वेचणीसाठी मजूर मिळेना झालेत. त्यामुळे बोंडातून फुटलेला कापूस झाडावरच उन्हात वाळत आहे. जमिनीवर गळून पडत आहे. त्यामुळे वजनात घट येत आहे.