सातारा : फलटण येथील निंबकर कृषी संशोधन संस्थेने विकसित केलेल्या ‘नारी सुवर्णा'' या जातीच्या मेंढ्यांचे चित्तुर जिल्ह्यातील (आंध्र प्रदेश) मेंढीपालक आणि शेतकऱ्यांना वाटप करण्यात येणार आहेत.

 

आंध्र प्रदेश शासनाच्या ग्रामीण दारिद्रय निर्मूलन समितीतर्फे या मेंढ्यांचे वाटप करण्यात येणार असल्याची माहिती ‘नारी` संस्थेने दिली. आतापर्यंत महाराष्ट्र, कर्नाटक व आंध्र प्रदेशात ‘नारी सुवर्णा'' जातीचे ५०० नर आणि ८०० मादी मेंढ्यांचे वाटप झाले आहे.

 

आंध्र प्रदेश शासनाच्या ग्रामीण दारिद्र्य निर्मूलन समितीच्या उपक्रमांतर्गत ‘नारी सुवर्णा'' जातीच्या मेंढ्यांचे वाटप करण्यात येणार आहे. यासाठी नारी संस्थेने नुकतेच २२ पैदासीचे मेंढे पाठविले आहेत. नारी संस्थेत गेली वीस वर्षे या जातीच्या मेंढ्यांची पैदास शास्त्रीय पद्धतीने केली जात आहे. या जातीच्या मेंढ्यांचा वाढीचा दर, रोग प्रतिकारकता आणि पुनर्उत्पादन क्षमता चांगली आहे. मेंढ्यांच्या अानुवंशिक सुधारणेसाठी ही जात चांगली असल्याची माहिती संस्थेतील तज्ज्ञांनी दिली. 

 

आंध्र प्रदेश शासनाने एक हजार शेतकरी उत्पादक संघटनांच्या माध्यमातून दहा लाख शेतकऱ्यांना संघटित केले आहे. त्यांच्या विकासासाठी कार्यक्रमाची आखणी करून प्रत्येकी ५०० ते १००० शेतकरी सभासद असलेल्या तीन उत्पादक संघटनांचे नऊ प्रतिनिधी नुकतेच फलटण येथे ‘नारी सुवर्णा'' जातीचे मेंढे निवडण्यासाठी आले होते.

‘नारी सुवर्णा`मुळे होणार जुळी, तिळी कोकरे

सध्या चित्तुर जिल्ह्यातील मेंढपाळ हे नेल्लोर जोडीपी जातीच्या मेंढ्यांचे पालन करतात. या मेंढ्या एका वेताला एकच कोकरू देतात. त्यामुळे मेंढपाळांना फारसा आर्थिक फायदा होत नाही.

 

‘नारी सुवर्णा''च्या नरामधील जुळी कोकरे देणारा जनुक पुढील पिढीत संक्रमीत होणार आहे. त्यामुळे या नरापासून जन्मणाऱ्या माद्यांना जुळी व तिळी कोकरे होतील. त्यातून मेंढपाळांच्या उत्पन्नात ३० ते ६० टक्के वाढ होईल अशी अपेक्षा आहे, अशी माहिती नारी संस्थेच्या डॉ. चंदा निंबकर यांनी दिली.