कऱ्हाड : राज्यातील सहकारी संस्थांचे सभासद हे ६० वर्षांवरील आहेत. देशाची भावी पिढी म्हणजेच युवक सहकारी संस्थांत आले पाहिजेत, यासाठी १८ ते २५ वयोगटातील जास्तीत जास्त युवकांना सहकाराच्या प्रवाहात आणण्यात येईल. त्यासाठी शासनपातळीवर धोरण राबविण्यात येईल. त्या माध्यमातून युवकांच्या सहकारी संस्था स्थापन करण्यासाठी विशेष बाब म्हणून परवानगी देण्यात येईल, अशी घोषणा सहकारमंत्री सुभाषराव देशमुख यांनी केली. 

कऱ्हाड (जि. सातारा) येथील बापूजी साळुंखे महाविद्यालय आणि सहकार भारतीच्या वतीने आयाेजित ''ग्रामीण विकासात सहकाराचे योगदान'' या विषयावरील दोनदिवसीय कार्यशाळेत ते बोलत होते. सहकार परिषदेचे अध्यक्ष शेखर चरेगावकर, अर्थतज्‍ज्ञ डाॅ. जे. एफ. पाटील, महाविद्यालयाचे प्राचार्य डाॅ. जे. एस. पाटील आदी उपस्थित होते. 

देशमुख म्हणाले, ''''विद्यार्थ्यांना सहकाराचे धडे देण्याची गरज आहे. गावोगावच्या सहकारी सोसायट्या कर्ज देण्याशिवाय काहीच करत नव्हत्या. आज २ हजार २०० हून अधिक सोसायट्यांच्या माध्यमातून व्यवसायाची सुरवात करण्यात आली आहे. त्यातून संस्था आर्थिक सक्षम होत आहेत. साखर कारखान्यांसारखे अनेक रोजगार देणारे उद्योग उभे राहिले आहेत. सहकार मोडला तर ग्रामीण भाग मोडून पडेल.'

चरेगावकर, डाॅ. जे. एफ. पाटील यांनीही मार्गदर्शन केले. प्राचार्य डाॅ. पाटील यांनी महाविद्यालयीन युवकांची सहकारी संस्था स्थापन करण्याची कार्यवाही बापूजी साळुंखे महाविद्यालयामार्फत केली जाईल, त्यासाठी आपण परवानगी द्यावी, असे आवाहन केले.