सोलापूर : सीना-माढा सिंचन योजनेच्या पाण्यासाठी कालव्याची मागणी आहे. त्यासंबंधी जलसंपदामंत्र्यांशी बोलणे झाले असून, येत्या ८ जानेवारीला संबंधित अधिकाऱ्यांची बैठक होईल. त्यामुळे लवकरच हा प्रश्न मार्गी लागेल, अशी माहिती खासदार विजयसिंह मोहिते-पाटील यांनी दिली. 

कुर्डू येथे सीना-माढा योजनेचे पिंपळखुंटे, अंबाड, शिराळ व कुर्डूला पाणी मिळावे, यासाठी चक्री उपोषण सुरू आहे. मोहिते पाटील यांनी या आंदोलकांची भेट घेतली. या वेळी आमदार नारायण पाटील, भारत पाटील, रवींद्र ननवरे, अतुल खुपसे, दादा टोणपे, पवन पाटील, शहाजी भोगे, विनय भगत आदी उपस्थित होते.

मोहिते पाटील म्हणाले, ``कृष्णा-भीमा स्थिरीकरणाच्या योजनेसाठी सर्वांनी मिळून आवाज उठविण्याची गरज आहे. या योजनेमुळे कायमचा पाणी प्रश्न मिटणार आहे. सीना-माढा योजनेचे पाणी आणण्यासाठी प्रयत्न करू. सर्वांना सोबत घेऊन पाणी प्रश्न मार्गी लावणार आहे. आंदोलनातील ३०० शेतकऱ्यांवर गुन्हे दाखल आहेत. ते मागे घेण्यासाठी प्रयत्न करणार आहे. त्यामुळे आंदोलन मागे घ्यावे.`` 

पण पाणी संघर्ष समितीतर्फे जोपर्यंत सिंचन योजनेच्या खोदकामाला सुरवात होत नाही, तोपर्यंत उठणार नाही, अशी भूमिका घेण्यात आली. लोकसभेला शिराळ, पिंपळखुंटे, अंबाड व कुर्डू गावांमध्ये मतदानाला बहिष्कार घालण्यात येईल, असा इशाराही दिला.