सांगली : जिल्ह्यातील ग्रामीण भागात असणारे कृषी सेवा केंद्र सकाळी आठ ते दुपारी बारापर्यंत सुरू ठेवली आहेत. जिल्ह्यात एक ते दोन महिने पुरेल इतकी रासायनिक खते आणि औषधे शिल्लक आहेत. मात्र, काही ठिकाणी पोलिसांची अडवणूक होत असल्याने ग्रामीण भागात खते देण्यासाठी अडचणी निर्माण होत असल्याची माहिती कृषी सेवा केंद्राच्या सूत्रांनी दिली.

जिल्ह्यात ‘कोरोना’च्या मुळे अनेक दुकाने बंद आहेत. मात्र, कृषी सेवा केंद्र सुरू ठेवण्याचे आदेश कृषी मंत्री यांनी दिल्याने जिल्ह्यातील ग्रामीण भागातील कृषी सेवा केंद्र सुरू आहेत. त्यामुळे शेतकऱ्यांना दिलासा मिळाला आहे. परंतू रासायनिक खते घेऊन जात असताना काही ठिकाणी पोलिसांच्याकडून अडवणूक केली जात आहे. ही अडवणूक थांबवावी, अशी मागणी शेतकऱ्यांनी केली आहे. तालुक्याच्या ठिकाणी कडक बंद असल्याने मुख्य शहरात असलेली दुकाने बंदच ठेवावी लागली आहेत. 

जिल्ह्यात पाच हजार मेट्रीक टन यूरिया शिल्लक आहे. तसेच इतर रासानियक खतांचा साठा देखील मुबलक प्रमाणात उपलब्ध आहे, अशी माहिती जिल्हा परिषदेच्या कृषी विभागाने सांगितले आहे. काही दिवसांत द्राक्षाची खरड छाटणी सुरू होईल, त्याला खतांची आवश्यकता भासणार आहे. तसेच ऊस, भाजीपाला या पिकांना सातत्याने रासायनिक खते आणि औषधांची मागणी आहे. 

‘कोरोना’चा प्रादुर्भाव होऊ नये यासाठी जिल्ह्यातील ग्रामीण भागात असणाऱ्या कृषी सेवा केंद्रांनी सकाळी आठ ते दुपारी बारापर्यंत दुकाने सुरू ठेवली आहेत. त्यामुळे शेतकऱ्यांना खते मिळत आहेत. सध्या रासायनिक खते आणि औषधे शासकीय गोदामात शिल्लक असली तरी, भविष्यात अपुरे पडू नये म्हणून खतांची मागणी केली असल्याचे संबंधित विभागाच्या सूत्रांनी सांगितले. प्रत्येक दुकानदार, डिलर्स यांच्याकडे पाठविण्यात अडचणी निर्माण झाल्या आहेत. 

कृषी मंत्री, जिल्हाधिकारी, जिल्हा कृषी अधीक्षक अधिकारी आणि जिल्हा पोलिस प्रमुख यांची बैठक घेऊन खतांची वाहतूक करणाऱ्या गाड्यांची अडवणूक करू नये, असे आदेश दिले आहेत. त्यामुळे वाहतूक सुरळीत होईल. बसवराज मास्तोळी - जिल्हा कृषी अधीक्षक अधिकारी, सांगली