हिंगोली  ः ‘‘कृषी विद्यापीठे, कृषी विज्ञान केंद्रांनी विकसित केलेले तंत्रज्ञान शेतकऱ्यांपर्यंत पोहोचविण्यासाठी कृषी निविष्ठा विक्रेत्यांची भूमिका मोलाची आहे. कृषी विस्तार सेवा पदविका हा अभ्यासक्रम पूर्ण केलेल्या कृषी निविष्ठा विक्रेत्यांना त्यादृष्टीने निश्‍चितच फायदा होईल,’’ असे प्रतिपादन जिल्हाधिकारी जितेंद्र पापळकर यांनी केले.

कृषी विज्ञान केंद्रांद्वारे कृषी निविष्ठा विक्रेत्यांसाठीच्या कृषी विस्तार सेवा पदविका (डिप्लोमा इन अॅग्रिकल्चरल एक्स्टेंशन सर्व्हिसेस फॉर इनपुट डीलर्स - डेसी) उत्तीर्ण कृषी निविष्ठा विक्रेत्यांना प्रमाणपत्र वितरित करण्यात आली. 

संत नामदेव सेवाभावी संस्थेचे अध्यक्ष माजी खासदार शिवाजीराव माने, आत्माचे प्रकल्प संचालक युवराज शहारे, कृषी विज्ञान केंद्राचे वरिष्ठ शास्त्रज्ञ आणि प्रमुख डॉ. पी. पी. शेळके, कृषी महाविद्यालयाचे प्राचार्य विष्णू बोंधारे, कृषी तंत्र विद्यालयाचे प्राचार्य माधुरी काटकर माने, कयाधू शेतकरी उत्पादक कंपनीचे संचालक महेंद्र माने, प्रा. नागेश माळोदे, प्रा. रमेश लोमटे, प्रा. साईनाथ मीनगिरे उपस्थित होते. 

पापळकर म्हणाले, ‘‘कृषी विस्तार सेवा पदविकेचा उद्देश निविष्ठा विक्रेत्यांनी शेतकऱ्यांना योग्य मार्गदर्शन करून त्यांच्या प्रगतीसाठी प्रयत्न करावे हा आहे. केव्हीकेच्या उपक्रमांचा  शेतकऱ्यांना फायदा होत आहे.’’

माने म्हणाले, ‘‘जिल्ह्यातील हळदीला हिंगोली हळद म्हणून भौगोलिक मानांकन मिळण्यासाठी जिल्हाधिकारी यांनी मदत करावी.’’ डॉ. शेळके म्हणाले, ‘‘राष्ट्रीय कृषी विस्तार व्यवस्थापन संस्थान, हैदराबाद यांच्याद्वारे केव्हीकेद्वारे कृषी निविष्ठा विक्रेता पदविका प्रमाणपत्र अभ्यासक्रमाच्या दुसऱ्या बॅचमधील ४० विद्यार्थ्यांपैकी १२ कृषी निविष्ठा विक्रेते विशेष प्रावीण्यासह उत्तीर्ण झाले आहेत.’’

या वेळी पापळकर यांच्या हस्ते प्रथम क्रमांक विष्णू बाहेती, द्वितीय प्रकाश डांगरे, तृतीय गोपाल झाडे यांचा सत्कार करण्यात आला. सूत्रसंचालन विजय ठाकरे यांनी केले. तर आभार राजेश भालेराव यांनी मानले.