चास, जि. पुणे ः खेड तालुक्‍याच्या पश्‍चिम पट्ट्यात खरीप हंगामातील भातपिके लोंब्यांनी लगडण्यास सुरवात झाली आहे. सोयाबीनची पिके शेंगांनी बहरली आहेत. 

या भागात काही दिवसांपासून पडत असलेल्या पावसाने पिके जोमदार असून, चांगले उत्पन्न मिळणार असल्याची खात्री पटल्याने शेतकरी वर्गामध्ये आनंदाचे वातावरण आहे. खेड तालुक्‍याच्या पश्‍चिम पट्ट्यातील प्रामुख्याने खरीप हंगामात भात हे प्रमुख पीक असून जवळपास ३२०० ते ३३०० हेक्‍टर क्षेत्रावार भात लागवडी करण्यात आल्या आहेत. 

वाडा, वाळद, आव्हाट, खरोशी, डेहणे, भोरगिरी यांसह परिसरात खरीप हंगामात भात हेच मुख्य पिक असून, चालू हंगामात चांगल्या होत असलेल्या पावसामुळे पिके जोमदार आहेत. सध्या पिकांना लोंब्या लगडण्यास सुरवात झाल्याने चांगल्या उत्पन्नाची आशा शेतकरी बाळगून आहेत. काही दिवसांपासून पुन्हा पावसाने जोरदार हजेरी लावल्याने पिके बहरली आहेत. 

भातपिके लोंब्यानी लगडल्याने पिकास पाण्याची नितांत गरज होती तर सोयाबीन पिकाची ही स्थिती तशीच असून भुईमूग पिकास आऱ्या लागण्याच्या अवस्थेत आहे. या पिकालाही पावसाची गरज असतानाचा पावसाने जोरदारपणे आगमन केल्याने पिकांच्या पोषणासाठी हा पाऊस उपयुक्‍त ठरत आहे. यामुळे खेडच्या पश्‍चिम पट्ट्यातील शेतकऱ्यांच्या चेहऱ्यावर उत्पादन वाढणार असल्याने समाधान झळकत आहे.