जालना : शहरातील नागरिकांना ‘लॉकडाउन’च्या कालावधीत घरपोच भाजीपाला व फळे विक्री करण्याच्या उपक्रमाला उत्तम प्रतिसाद मिळतो आहे. कृषी विज्ञान केंद्र खरपुडीतर्फे सुरू झालेल्या या उपक्रमाला कृषी विभाग व ‘आत्मा’चे विशेष सहकार्य मिळते आहे. 

लॉकडाउनच्या कालावधीत शेतकऱ्यांच्या फळे भाजीपाला विक्रीचा प्रश्न मार्गी लागावा, सोबतच ग्राहकांनाही वाजवी दरात उत्तम दर्जाचा भाजीपाला व फळे उपलब्ध व्हावी, यासाठी ‘केव्हीके’ने कृषी विज्ञान मंडळातील शेतकऱ्यांच्या समन्वयातून शेतकरी ते ग्राहक घरपोच फळे-भाजीपाला उपक्रम राबविण्याचे ठरविले. यासाठी जिल्हा अधीक्षक कृषी अधिकारी बाळासाहेब शिंदे, कृषी उपसंचालक विजय माईनकर यांच्याशी कृषी विज्ञान केंद्राचे प्रमुख व कार्यक्रम समन्वयक एस. व्ही. सोनूने व त्यांच्या सहकाऱ्यांनी संवाद साधला. 

या संवादातून जवळपास ७० शेतकऱ्यांची नावे या उपक्रमासाठी पुढे आली. शेतकऱ्यांच्या भ्रमणध्वनी क्रमांकाचा व्हाट्सअप ग्रुप तयार करून त्यामधील समाविष्ट शेतकऱ्यांकडे असलेली फळे व भाजीपाल्याची माहिती संबंधित शेतकऱ्यांच्या भ्रमणध्वनी क्रमांकासह जालना शहर व जिल्ह्यातील विविध तालुक्याच्या ठिकाणी नागरिकांपर्यंत पोहोचविण्याचे काम कृषी विभाग, आत्मा व कृषी विज्ञान केंद्राच्या समन्वयातून केले गेले.

यामधून शेतकऱ्यांच्या उत्पादित फळे व भाजीपाल्याला अपेक्षित दर मिळणे शक्य झाले. शिवाय ग्राहकांनाही ही ताजी फळे व भाजीपाला वाजवी दरात मिळाला. या उपक्रमाच्या माध्यमातून सुरू झालेली फळे भाजीपाला विक्रीची उलाढाल आता शेतकरी ते ग्राहक अशी थेट साखळी निर्माण करण्याला मदत करीत असल्याचे चित्र आहे.