कोल्हापूर : जिल्ह्यातील ११ लाख ७२ हजार बँक ग्राहकांनी सुरक्षा विमा आणि जीवन ज्योती विमा योजनेत सहभाग नोंदविला आहे, या विमा योजनांच्या नूतनीकरणास सोमवार (ता. २५) पासून विशेष मोहीम राबविण्यात येणार असल्याची माहिती जिल्हा अग्रणी प्रबंधक राहुल माने यांनी दिली.

श्री. माने म्हणाले की, पंतप्रधान सुरक्षा विमा व पंतप्रधान जीवन ज्योती विमा नूतनीकरण मोहीम जिल्ह्यात दिनांक २५ मे ते १ जून २०२० या कालावधीत राबविण्यात येणार आहे. देशामध्ये सार्वत्रिक सामाजिक सुरक्षा प्रणाली अस्तित्वात आणण्यासाठी ९ मे २०१५ रोजी सामाजिक सुरक्षिततेच्या पंतप्रधान सुरक्षा विमा योजना व पंतप्रधान जीवन ज्योती विमा या दोन महत्त्वाकांक्षी योजना सर्व बँकांच्या माध्यमातून गरीब व वंचित घटकांसाठी सुरू केल्या आहेत.

जिल्ह्यात पंतप्रधान सुरक्षा विमा योजनेअंतर्गत ७ लाख ८० हजार बँक ग्राहकांनी तर जीवन ज्योती विमा योजनेअंतर्गत ३ लाख ९२ हजार बँक ग्राहकांनी सहभाग नोंदविला असून यापुढील काळातही जिल्ह्यातील अधिकाधिक नागरिकांनी त्यांचे बँक खाते असणाऱ्या बँकेत या योजनांचा लाभ घ्यावा, असे आवाहनही श्री. माने यांनी केले आहे.

पंतप्रधान सुरक्षा विमा योजना ही अपघाती मृत्यू व अपंगत्व यासाठी २ लाखापर्यंत विमा संरक्षण देणारी योजना असून वय वर्षे १८ ते ७० वयोगटातील व्यक्ती यामध्ये सहभाग घेऊ शकतात. या योजनेचा वार्षिक हप्ता केवळ बारा रुपये आहे. तर जीवन ज्योती विमा योजना ही नैसर्गिक अथवा अपघाती मृत्यू झाल्यास २ लाखापर्यंत विमा संरक्षण देणारी योजना असून वय वर्षे १८ ते ५० वयोगटातील व्यक्ती यामध्ये सहभाग घेऊ शकतात. या योजनेचा वार्षिक हप्ता ३३० रुपये आहे.

जिल्ह्यातील नागरिकांनी आपले बँक खाते ज्या बँकेत आहे, त्या शाखेत, बँकेतर्फे नेमणूक करण्यात आलेल्या व्यवसाय समन्वयक व ग्राहक सेवा केंद्रात अर्ज करावा. तसेच पोस्ट बँकेत, पोस्ट ऑफिसमध्येही अर्ज करता येतो. जे ग्राहक या विमा योजनेपासून वंचित आहेत त्यांनी आपल्या बँक शाखेशी, व्यवसाय समन्वयक ग्राहक सेवा केंद्राशी किंवा पोस्ट ऑफिसशी संपर्क साधून या विमा योजनांमध्ये आपला सहभाग नोंदवावा, असे आवाहनही श्री. माने यांनी केले